Referral Hospital tihchangtlun
Eptu MLA-te chuan Falkawna State Referral Hospital tihchangtlun tum dan leh Aizawl Civil Hospital tihtêt a tum chu an duh loh thu an sawi a, heng damdawi-in pahnihte hi a hmunah an tlawh a ni.
Opposition MLA-te hian Aizawl Civil Hospital an tlawhnaah State Referral Hos-pital lamah doctor leh bungruate sawn chhuah a nih avangin mipuiin harsatna an tawk niin an sawi a, tun hma aṭanga mipui nawlpuiin an pan phak Aizawl Civil Hospital tihtet tumna awm chu ṭha an tih loh thu an sawi. Referral Hospital tihchangtlun tumna an do loh thu an sawi rualin Aizawl Civil Hospital tihtet tumna erawh ṭha an tih loh thu an sawi.
A hmingah pawh Referral Hospital tih a ni chungin Falkawna damdawi-in hi a pachhe rei hle a, tun hnaiah sorkarin thuam ṭhat a tum. He damdawi-in hi a sak ṭanlai
aṭang tawhin a bilhah a tho lo a, politics-a inbeihna hmanruaah a chang chho a, tun thlengin a la puitling thei lo. Sorkarin Referral Hospital tihchangtlun tumna a nei hi thil lawmawm tak chu a ni ngei a; nimahsela an kalpui hmanhmawh dante hi phai lam aṭanga endiktu lo kalte laka inteh tlintir tumna ngawr ngawr a ni palh ang tih a hlauhawm hle.
Mizo mipuiin damdawi-in ṭha kan mamawhzia chu tun hnaia phai damdawi-ina kan bill chawi zat aṭang pawhin chiang takin a hriat theih a, Mizoramah hian damdawi-in changtlung tak hi nei thei ila kan doctor-te thiamna hi a nêp bik lo. Damdawi-in thuam ṭhat duhna leh tumna awm hi thil lawmawm tak a nih rualin a awm sain a tawrh theih tur zawnga kalpui erawh a fel ber lo ang.
Medical college din tumna awm pawh state tan hmasawnna a ni a; nimahsela medical college zinga a
ṭha lo pawl, a zir chhuakte pawhin hmun danga zirte an tluk lohna medical college din palh a hlauhawm a, hmanhmawha nawr loh hi a finthlak mai thei. Thuneitu lamin Referral Hospital tihchangtlun an tumna leh medical college din tura hma an laknaah hian quality lam hi ngai pawimawh se, 'neih ve hrim hrim' tumna rilru inhruaitir lo se, ram tana ro tling tur lam enin damdawi-in
ṭha leh changtlung tak din ni ngei rawh se.