Truck neitute thu kha

Mizoram Truck Owner's Association (MTOA) chuan thuchhuah siamin, Sihhmui Tlawng lei chim chhan chhuina report-ah, 'Motor-in a dâwl zawh bak phura a zawh ṭhin vang a ni' tih a nih avangin, rit phur truck-te zawh tlak ngeia lei dawh turin Mizoram sorkar an ngen.

Lei chim chhan inquiry report aṭanga a lan danin truck neitu leh khalhtute mawhphurhna chin a awm niin a lang a, hei hi truck neitu lam chuan an sawifiah a ni. MTOA chuan, "Truck-te'n rit tak tak an phur lo thei si lo a, kan motor leh a khalhtute hi dinhmun derthâwngah an awm tihna a ni. Chuvangin, Mizoram chhunga lui kânna leite hi rit phur zawh tlak ngeia dawh turin sorkar kan ngen a ni," an ti.

Mizorama lei dangte pawh a ṭha tawk lo tih hmuhchhuah belh zel a ni a, a hlui tawhin a hmanruate a rinawm tawk tawh lo a, hei hian mipuite tan harsatna lian tak a siam thei dawn a nih hmel. Truck lianin a zawh ngam loh lei pawimawh tak tak kan neih zel chuan bungraw phurh man a to zel ang a, chu chu mipuiin a tawpah an tuar thei.

Tun thlenga Mizorama kawngpui pawimawh ber pawla lei dawh tur an la tifel thei lo hi thil mak tak a ni a, sorkar hian tun aiin Sihhmui bula Tlawng lei hi ngaihsak rawh se. Tun hnaia chim ta lei hi dawh ṭhat a nih loh pawhin lei siamlai mek an siam zawh hmaa an hluihlawn titih tawh hi sorkar hian a enzui a ngai a, mi pawimawh berte pawhin kawngpui kual zawk leh chhe zawk an zawh phah a ngai reng mai hi a zialo hle a ni.

Truck neitu lamin motor lian zawh tlak lei siam an duh thu an sawi hi thil pawimawh tak a ni a, hmun tinah lei ṭha leh tlo hi dawh theih a nih loh pawhin, kawngpui pawimawh zual bika leite hi chu a tloin a ṭha ngei tur a ni a, lei a rinawm loin a tlo lo a nih chuan sorkar mualphona a ni ang.