Ruihhlo donaah tih theih kan nei vek

Champhai district-a police-te chuan kumin August thla tàwp lam aṭanga ruihhlo do (special drive) an kalpui hnuah cheng nuai 1,311 hû ruihhlo an man tawh tih, October 14, 2023-a Champhai district-a expenditure observer Abhishek J Jain hoa ṭhukhawmnaah tarlan a ni a; zu cheng nuai 44 hû leh zu kaihhnawih thil tam tak an man tawh thu tarlan a ni bawk.

Tun hnai thla khat chuang âwrh chhunga district pakhat chauh huam chhunga zu leh ruihhlo dangte police-in an man hi a tam tham hle mai a. District pakhatah chauh pawh heti zat ruihhlo an man a nih chuan, Mizoram puma an man zat chu a tam tham lehzual hle ang tih a chiang a ni.

Ruihhlo leh ruihhlo ti ṭhinte buaipuitu sorkar agency te, Central YMA hruaitute leh NGO danga inhmangte chuan Mizoramah ruihhlo a hluarzia te, thingtlang kilkhâwr tak takahte pawh ruihhlo ti an awm tawh thu te, tleirawlte zingah pawh ruihhlo ti an tam tawh thute an sawi ṭhin a; a dik ngeiin a rinawm.

Mizoramah hian ruihhlo a hluar hle tih hi rinhlelh tur a awm lo a, mi tinin kan pawm tlân a, ruihhlo dona lamah pawh kan rilru kan sên ṭheuh a ngai tak zet tawh niin a lang.

Ruihhloin a tihbuai loh chhungkuaa awmte pawhin ruihhlo hian kan chhungkua leh kan laina hnaite a la man ve thei a ni tih hriain, ruihhlo laka kan fihlim zel theih nan tun aṭanga kan inzirtira kan infuih sauh sauh a ngai. Ruihhlo dona lamah pawh kan phak ang tawka rilru leh ngaihtuahna kan sen a, kan inhman vete pawh a ngaiin a rinawm.

Ruihhlo doa a taka che chhuak chi an awm a, che chhuak thei miah lote pawh tam tak an awm. A taka che chhuak thei lote tan pawh engtin emaw tak hmalak theih dan a awm zel. Ruihhlo hlauhawmzia te, ti chhin miah lo tura ṭhalaite zirtir leh kaihhruai kawngah te, a taka thawktute thinlunga lo thlâwpte leh ṭawngṭai thlengin tih theih kan nei vek a ni. Chuvangin, ralbang mai loin, kan phak tawk mil zelin ruihhlo donaah hian theihtawp chhuaha kan ṭan tlân a ngai a ni.