Ruihhlo hluar buaipui a ngai

Tun hnaiah Mizoramah ruihhlo chi hrang hrang a hluar leh ta hle a, Police, Excise department leh tlawmngai pawl lamin a khat tawkin man tur an nei reng a ni.

Ruihhlo hi a hlawma a lian thama man tur a awm ta zauh zauh a, hei hian Mizoram chhungah ruihhlo a tam hle tih a lantir thei ang. Tun hnaiah bik hian ruihhlo hi a zalen thar ta deuh emaw tih tur khawpin a hluar leh ta a, hei hi sorkar hian beng sika a ngaihtuah a ngai a ni.

Mizoramah zu khap burna dan hun rei tak hman a ni a, hetih chhung hian zu a rèm lo a, ruihhlo pawh lei tur a awm reng. Tunah zu khapburna dan hlipin sorkarin dan hnuaiah zu a zuar ṭan ta a, zu an zawrh tak avang hian ruihhlo dang zuartute hian sorkar leh khawtlang hi an zuam ta ngawt a nih chuan a fel lo hle ang. Sorkar pawh hian zu a zuar ngam a, zu aṭanga chhiah lut lam ringawt ngaihtuah lo hian zu zawrh hnua ruihhlo lo hluar ta do tur hian thapui a thawh a ngai khawp mai.

Central YMA lam chuan ruihhlo do tura a din SRS chu a din chin tura a ruahmanna awm sa a pawtsei a, ramin a mamawh vang a ni. Anni hi awm lo phei se Aizawl khawpui leh a chhehvelah hian ruihhlo hi a zalen lehzual dawn niin a rin theih a, tlawmngai pawl lam hian ram chhanna kawnga an ke pen hi tun aiin uar se; ruihhlo do hi ram leh hnam humhalhna a ni tih hre chungin ṭang zel rawh se.

Tun hnaia ruihhlo lo hluar leh ta avang hian nu leh pate pawhin kan fate a la naupang zawk hi kan zirtir ṭhata kan hum an ngai a, a tisual tawhte siam
ṭhat a harsat avangin inven a ngai. Sikul zirtirtu leh kohhran hruaitute thlenga kan ṭan tlana inzirtirna lam kan uar deuh deuh a ṭha a, a taka ruihhlo dotu lam pawh tun aiin ṭang zual zel rawh se.