Fai ber nih i tum ang

Sorkar laipui chuan faina lama khawpui 73-te dinhmun tehna 'Swachh Survekshan - 2016 Survey' result a puang a; Aizawl chu hmalak tawh china khawpui fai 41-na a ni. Khawpui fai bera thlan chu Mysuru a ni a, khawpui bâl bera thlan chu Dhyanbad a ni.

Aizawl khawpui hi India rama khawpui fai lam tehnaah 41-na a ni a, Aizawl aia khawpui fai zawk 40 an awm tihna a ni a, ṭan lak a ngai hle. India ram khawpuite hi a fai tawk lo tiin sawi ṭhin mah ila, tehna hrang hrangah Aizawl aia khawpui fai zawk 40 an la awm hi thil zahthlak angin pawm ngam ila, fai kawnga ṭan la tura min fuihtu ni thei se a ṭha khawp mai.

Vai kan tih maite hi khawvela faina ngaina ber an ni lo tih chu an khawsak danah a hriat a, an chenna hmunhmate bakah khawpuite pawh a fai tawk lo hle a ni. India rama khawpui lian ber berte pawh hi tui luankawr mumal lo, bawlhhlawh paihna pawh nei fumfe mang lote an ni a, mipui nawlpuiin faina an dah pawimawh lo hle. Chuti chung chuan tluk loh kan la neih nual avangin kan ṭan thar a ṭul khawp mai.

Khawpui fai tehfungah hian eng chiah nge an hman hre lo mah ila tuna an tehna hi ṭan lakna atan hmang ila, Mizoram pum tifai tur hian a chhunga chengte hi kan ṭha tawk a ni tih i inpawm ang u. Kan khawpui berte pawh hmun dangte angin mipui cheng an la tam lo a, a area pawh a la zau lutuk lo bawk a, fai taka vawn hi thil theih a ni.

India ramah hian state fai ber nih tumin sorkar hotu lu aṭangin tih tak takna nen nawr ila thil theih a nih ngei a rinawm. Tun hmaa hnam bâl tak ni ṭhin hun rei lo te chhunga kan fai tak duak dan en hian, inzirtirna ṭha leh inkaihhruaina fel tak nen chuan India rama fai ber nih hi kan tlin ngeiin a rinawm - i ṭang thar ang u.