MKHC ngenna ngaih pawimawh ang u

Mizorama kohhran pawl hrang hrangte telna Mizoram Kohhran Hruaitute Committee (MKHC) chuan kan hma lawka Mizoram MLA inthlanpui neih tur pualin thuchah an tichhuak a; hlêpna bawlhhlawh leh thamna duh lo mi, ruih theih thila fihlîm candidate atan dah tur leh, a taka tih theih loh tur zuara thil tiam lo turin political party-te leh candidate-te an ngen.

MKHC chuan, mi tlemtête hamṭhatna tur bil thil intiam ang chi ṭha lo an tih thu leh a taka tih theih loh tur zuara mipui bumna ang thil intiam loh an duh thu an tarlang a; vote lei tum lo tura party leh candidate-te an ngen rualin, sum leh therhlo hmanga lei tumtute lakah an vote hralh lo tur leh vote lei tumtute hnâwl turin mipui an chah a ni.

MKHC ngennate hi a pawimawh hle mai. Kan ramah inthlanna muanawm, felfai leh thianghlim a awm theihna atan leh sorkar ṭha a din theihna atana pawimawh tak tak vek a ni a; political party, candidate leh party worker zawng zawngte bakah, mipuiin kan ngaih pawimawha kan zawm ngei tana thil ṭha em em a ni.

Inthlana candidate-in sum an sén tam lutuk ṭhin hi an tlin hnua eirukna leh hlemhlêtnaa inhnamhnawihtirtu a nih thu sawi a ni ṭhin a, a dikin a rinawm. Ram hruaitute'n dik taka ram an hruai a, corruption-a an fihlim theih nan vote lei te, sum leh therhlo semte hi kan hnâwl a ṭul a, hei hi ram siamṭhatna tura mi tinin kan tih theih a ni.

MKHC-in tharum thawhna chawk tho thei zawnga ṭawngkam uchuak leh inelsên lam chi sawi lo tura an ngenna te, zawlnei derte thupuan hnâwl tura mipui an chah te, vote nei zawng zawngin vote thlak vek tura an ngenna te, sorkarna siamtu apiang Pathian ruat an ni tih pawm thiam a pawimawh thu an tarlan te, mi ṭha thlan chhuah a nih theih nan leh muanawm taka inthlan a nih theih nan ṭawngṭai tura mipui an ngennate hi zawm ṭheuh thei ila a duhawm hle mai.