Hnathawktu awm bo

Governor Lt. Gen. Nirbhay Sharma chuan, SSA Mission hnuaia thawktu, an awmna hmun (post)-a awm lote chhui chiang a, a ṭul anga hma la turin chief secretary Lalmalsawma a hrilh. Larsap hi tun hnaia Mamit a tlawh ṭumin tlawmngai pawlte'n Mamit district-a SSA hnuaia thawk tura tih mi 42-te chu Mamit district chhunga an awm loh thu an lo hrilh a ni.

Mizoramah hian mahni hnathawhna hmuna awm lo sorkar hnathawk hi an awm leh ṭhin a, a pawi khawp mai. Mamit district chhungah ringawt mi 40 chuang SSA hnuaia mi vek ni si an awmna tur hmuna an awm lo hi thil mak tak a ni a, sorkar hian a chhan dik tak a sawi chian a ṭul khawp mai.

Sorkar hnathawk zingah mahni awmna tur hmun duh-thlang thei ang hiala puh tur an awm ṭhin hi thil mak tak a ni a, sorkar hnathawk chu khawi hmunah pawh awm thei tur an nihlaia hmun kilkhawra awm duh lo an awm hi a inhmeh lo hle. Sorkar hnathawk ni si, sorkarin a mamawhna hmun leh awm tura a tihna hmuna thawk duh lo hi chuan an hna hi chawlhsan se an inhmeh zawk awm e.

Mizorama thil buaithlak tak chu sorkar hnathawk ni si, khawi pawlah emaw hruaitu an nih vanga transfer leh posting tibuai theite an awm a; tute chhung hnai emaw an nih vanga sawn hlat theih miah lohte an awm bakah hmun hrehawm deuha kal tura tih vanga chhuanlam phuahchawpa chawlh la ta daih ṭhinte thlengin an awm. Hei hian kan sorkar hnathawk inrelbawl danah inthununna (discipline) a tlahniam hle tih a lantir a ni.

Sorkar hnathawk mahni hmuna awm lo kan la nei zel mai hi sorkar lamin enfiah se, sorkar hnathawk chu sorkarin awm tura a dahna hmunah an awm ngei tur a ni.