Tihdam sumdawnna

Mizoram pawn aṭangin tun hnaiah doctor thiam tak tak Mizoramah an lo lut ṭhin a, state pawna damdawi-in nei mi ṭhenkhatte pawhin Mizoram chhungah an damdawi-ina thil awmte an rawn zuar ve mek bawk.

Mizoramah hian damdawi-in kan nei ṭha chho ve zel a, sorkar damdawi-inte pawhin hma a sawn mek a, private damdawi-in ṭha tak takte pawh kan nei mek. Heng damdawi-ina enkawl theih loh damlo ṭhenkhate chu state pawna inphurh chhuah a ngai fo a, kan hmanraw neihin a la tlin loh avangin state pawn damdawi-inte hi kan pan lo thei lo a ni.

Hetihlai hian state pawn damdawi-in ṭhenkhat rawn inzawrh ṭhin dante leh doctor ṭhenkhat lo kalte awm dan hi chu fimkhur deuha ngaihchan ngai an ni a, rinhlelh leh hnawk lo tih nghal ngawt a remchang lo a; nimahsela fimkhur thiam erawh a pawimawh khawp mai.

Mizoramah doctor-te rawn man bithliah fel tak a awmlai pawhin state pawn aṭanga lo kal hi chu an duh ang zat rawn man an inchhiar mai a, mipui pawhin phun loin kan zawm mai ṭhin. Damlo inenkawlna man pawh hi state pawn damdawi-inah hian a to zawk tlangpui a, kal man paih vek pawhin kan insenna hi a tam zawk ṭhin a, natna tlanglawn leh Mizorama kan enkawl theih chi angah phei chuan insensona thlawn mai a chang palh thei tih hriat a ṭha awm e.

Tuna mipuite kan fimkhur a ṭulna chu state pawn lam mi an ni emaw, Mizoram chhunga Mizo doctor-te ngei pawh ni rawh se, sumdawnna leh sum hmuhna tur liau liaua tihdamna ni sia thil zawrh ching an awm ṭan tawh, tih hi a ni. Doctor hna chu tihdam a ni a, an hna an thawh hi an eizawnna a ni a, sum an mammawh ngei mai a; nimahsela mipui rawk zawng leh mipui ei hek lutuk tura thil kalpui a, tihdam hna sumdawnna ang lek leka chhuah hreh lo doctor an awm ta zauh zauh hi a fel lo a, heng mite khapa veng thei tur ber chu a doctor dangte bawk hi an ni awm e - tihdam hna hi sumdawnna chi khata a chhuah lohna turin doctor-te an ṭan a ngai e.