Buhfai

Rajya Sabha MP Ronald Sapa Tlau chuan, fûr ruahtui tlak laia buhfaia harsatna a thlen loh nan Silchar aṭanga Bairabi rel lian luhna tur kawng siam mek chu March thlaah zawh a nih tur thu a sawi a, "Rel lianin Punjab leh Haryana aṭangin direct-in buhfai a rawn phûr lut zung zung thei tawh dawn a ni," a ti a; Ramrikawna Food Corporation of India (FCI) kudam chu Sihhmui lamah sawn tuma hmalak mek a nih thu leh, kudam thar tur hmun pawh enfiah a nih tawh thu a sawi.

Mizo mipuite ei ber chu buhfai a ni a, Mizoramin kan kham khawp buh kan thar chhuah loh avangin state pawn lam aṭanga buhfai lakluh hi kan innghahna a ni. Tun hma deuh khan buhfai lei tur awm lo leh buhfai lei tur awm chhun pawh chhe lutukte kha a ni a, tun hnaiah buhfai kan hnianghnar ṭan ta a, a lawmawm khawp mai.

Mizote hian kan ei leh in kalhmang hi kan thlak a nih ngawt loh chuan buh hi kan chaw ei ber a la ni chho zel dawn a, buhfai manah hian kan la inseng nasa dawn khawp mai. Tuna kan sorkar chak leh chak lo tehna chu 'Buhfai an thar chhuak tam em?' tih pawh a ni phak lo a, 'Buhfai an lalut ṭha thei em?' tih a ni ber a; kan thlen chin hi a la hniam khawp mai.

Ṭhenkhatin tun hmaa buha kan intodelh ṭhin thute an sawi ṭhin a, khatih hunlai kha chu hna dang thawk loa mahni ei khawp thar chhuah tum ngawr ngawra kan beihlai a ni a, tunlai nen khaikhin chi a ni lo. Chuti chung chuan sorkar hian buh thar tam zawk tura a beih mekna hi tun aia chak hian kalpui se, khawvel hi changkang tawh hle mah se a tawpa tawpah chuan mihring ei leh in tur thar chhuah hi thil pawimawh ber zinga mi a ni tho tho a ni.

Tunah chuan sorkarin mi buh thar chhuah sa a lakluh chak deuh chuan sorkar chak tak angin kan sawi ta a ni a, mahni intodelh lam chu kan sawi ngam tawh lo. Engpawhnise mipui mimirin kan ei ber a nih vangin buhfai hnianghnar taka lei tur chhawp reng hi sorkar mawhphurhna a ni a, ṭan la zel rawh se.