Inthlan leh therhlo sem

Mizoram People Forum (MPF) leh political party-te inremna thuthlungah inthlan dawna sum leh therhlo sem loh tur thu a chuang a, hei hi ṭha taka zawm theih ni se ṭha hle.

Thawhona thuthlungah hian, "Sum leh therhlo dang hmanga vote lei leh hralh hi Election Danin a phal loh avangin tih hauh loh tur a ni. Mipui, pâwl hrang hrang leh kohhrante pawhin party leh candidate-te hnênah thil phût neih tur a ni lo. Chutih rualin thil chi hrang hrang sem, (Entîr nan Silpouline, Jersey, Football, Mobile handset etc.) leh sawrkar development kal lai leh thil dang sem te, buh leh thil dang inphurhsak te hi Election Model Code of Conduct-in a phal loh avangin tih loh tur a ni," tih a chuang.

Inthlan dawn hian political party tin hi sum leh therhlo semah an inpuh tawn châwk a, tute emaw hi chuan an sem ṭhin a nih a rinawm. Hei hi MPF-in a duh loh leh a khap tlat ni mah se zawm a hlawh lo hle niin a lang a, kan ram inthlan dan kalphung hi a chhe zawngin a inher ang tih a hlauhawm hle.

Tuna thil kalphung en hian tute emaw hi chuan ualau takin sum an neih thu an tlangaupui ngam a, heng sumte hi inthlan hmachhawnna tura an neih thute an sawi a, hei hi MPF zirtirna nen chuan thil inpersan tak a ni ang.

Sum leh therhlo sem hi kan duh lo tak tak a nih chuan huaisen takin dodal ngam ila, MPF lam pawhin ṭan la zel se a ṭha awm e.