MPF an huaisen a ngai

Mizoram People Forum (MPF) hruaitute chuan, MPF leh political party-te thawhhona thuthlung chu MPF siam bik a ni lo a, political party tin aiawhte nen an sawiho hnua an pawm tlân, party president ṭheuhin hming an ziah hnan a nih avangin, thuthlung bawhchhiat chu mipui zah lohnaa an ngaih thu an sawi.

MPF hian inthlanna dik leh thianghlim a awm theihna turin theihtawp an chhuah a, chumi avang chuan Mizoramah pawh inthlanna felfai tak a awm theih phah ṭhin. Hetihlai hian MPF inremna thuthlung zawm lo; mipui zah loa hma la an awm zel thung a, ngaihtuah chuan a ṭul hle a ni.

Tun hnaia political party hruaitu pakhat rawn zin chungchangah MPF chuan kawng zawh lo turin ngenna an siam a, chuti chung chuan kawng an zawh lui ta tho tih MPF General Secretary chuan a sawi. MPF dinna hmun, chutah pawh Aizawl khawpui lailiah ram pum huapa kawng zawh a ni a, hei hi MPF leh political party inremna thuthlung bawhchhiatna langsar ber a ni hial em?

Ruaiṭheh loh tih te, sum leh therhlo sem loh tur tihte, flag leh banner tar phal zat bitukte hi thil lawmawm tak a ni a, chutih laiin a bawhchhe huai deuhin an bawhchhia a, MPF a ngawi leh si a nih chuan a fel lo ang.

MPF tán pawh rorel thiam a harsa ngei ang tih a chiang a, chuti chung chuan Mizoram hian MPF khauh tak, MPF huaisen leh viak ṭha tak a mamawh takzet a ni.