Ṭhalaite eizawnna
Mizoram Governor leh Mizo-ram Youth Commission (MYC) chairman chu tun hnai khan Raj Bhavan-ah an inkâwm a, skill development atana Mizoram sorkar hmalaknate an sawi dûn. Larsap chuan, Act East hmalakna huang chhunga ram dang nen insumdawn tawnna lo thleng turah Mizo ṭhalaite'n hlâwk taka an chhawr theih nan MYC chuan hna pawimawh tak leh hna hmanhmawh thlak tak an neih thu a sawi a; Mizoram chhunga ramhmul damdawite suma chantir a nih theih nan MYC-in Mizo ṭhalaite tan inzirna kawng dap se ṭha a tih thu a sawi.
Mizoram Larsap hian Mizo ṭhalaite tana eizawnna siam-sak lam hi a ngai pawimawh hle tih a thu sawi ṭhin aṭangin a hriat theih a, tun hnaia MYC hotupa nen an inkawm pawh hi thil lawmawm tak a ni. Mizo ṭhalaite thuak ṭhatzia leh thiam thil ngahziate uar takin sawi ṭhin mah ila, eizawnna tura hnathawh an thiam tel si loh chuan an thiamna chu a chhawrna a tam lo hle tihna a ni a, eizawnna nena inzawm thiamna zir uar a hun tawh khawp mai.
Tunlai khawvelah chuan skill development lam an dah pawimawh tawh hle mai a, zirna kalkawng tluang pangngaia kal a ṭhat rualin hnathawhnaa chhawr theih nghal thiamna zir hi eizawnna atan a pawimawh tawh takzet a ni. Tun hma deuh chuan sorkar hna han thawh mai tur
ṭhahnem tak a awm a, lehkha zir sang deuhte phei chu hna zawn pawh ngai mang lo khawpin an zir chhuah rual rualin sorkar-ah hna an hmu mai ṭhin a ni.
Tunah erawh hna a vâng tawh a, sorkar hnathawh beiseitu tan phei chuan a vang tawh takzet a ni. Eng hna pawh, a hniam emaw a sang emaw diltu an ṭhahnem thei hle a, a thiam leh tlingte tan chuan MPSC lamin examination a buatsaihah inziah tlin theih a ni a; nimahsela mi nawlpui tan chu chu thil harsa tak a ni si a, eizawnna atana hman nghal theih thiamna kan luhchilh ngam a hun ta.
Mizo ṭhalaite hian zir sanna ringawt hi eizawnna a ni lo tih an pawm ngam a hun a, eizawng tura sorkar-a innghah hi a thlamuanthlak tawh lo tih an hriat a ngai a; mahni thiamna hmanga eizawng thei tura kan insingsak a hun tawh a, hei hi tunlai khawvela eizawnna kawng pawimawh tak chu a ni e.