Police-te zahawmna humhim a ngai

Tun hnaiah Aizawl khawpuiah police officer pakhat leh a driver chu a duty laiin mi kut an tuar a, police patrol duty pahnih khawih rawntua puh mi pasarih zinga paruk chu Court thu angin Central Jail-ah dah an ni.

Tun hnaia police-te chunga thil thleng hi ngaihthah mai chi a ni lo a, venghimtu tur berte chunga kutthlak duh an awm ta hial mai hi a zialo hle a ni. Tun hnaia Bungkawn Venga thil thleng hi zu rui thiltih pawh a ni mai thei a; nimahsela hei hian ngaihtuahna thar min puttir se, police-te kan hmuh danah leh police-te awm dan thlengin kan ennawn a hun ta khawp mai.

Police-te hi hlauh tur emaw kan tih hunlai a awm a, tunah erawh chuan police-te chu hlauh tur ni loin zah tur leh ṭha taka kawm theih an nihzia kan hre ṭan mek. Tun hnaiah erawh police-te zah lo mai pawh ni loa hlau lo leh a huhoa punkhawm avanga police-te pawh palzut thei nia inngaihna a lian thar ta a, a pawi khawp mai.

Mipui lam kan inzir a ngai hmasa a, min venghimtu turte pawh zah tawh lo mihring awm khawm kan nih mai chuan a pawi khawp mai. Police-te hlauhawm lohna leh zahawm lohna state kan nih chuan, a tuartu tur chu a chhunga chengte bawk hi kan ni. Police kutthlaktute leh kutthlak duh hialtute hian anmahni leh an ram venghim tura an mamawh chu police tho hi an ni tih an hriat a ṭha khawp mai.

Police lam pawh an inzir a ngai. Tun hnaiah police inthlahdah tak tak, hmel en pawha zahawm lo leh rui ṭawng tak maite thlenga hmuh tur an awm hi a zahthlak a, darthlalangah an inen ngam a hun ta. Police lak aṭang tawhin thil fel lo a awm a, a tling leh fel zawkte aia duhsak zawng, zu leh ruihhloa fihlim lo tam tak lak an ni a, hei hian police zah-awmna pawh a khawih phak hial a ni.

Tun hnaia thil thleng hi kan zavaiin inzirna atan hmang ila, police officer a hna rinawm taka a thawklai Mizote ngeiin kut an thlak hi a zahthlakin a pawi takzet a, pawi khawihtute hi dan anga na taka hrem ni ngei se. Mizoram police-te zahawmna vawnghim turin Mizo mipuite'n ṭan la thar ila, police-te zahawmna innghahna lian ber erawh a police-te bawk hi an ni e.