Term tawp dawnah AR bawk

MNF Adviser chuan tun hnai khan press conference neiin Assam Rifles nawr chhuak turin an bei chhunzawm zel tih a sawi a, term tharah nawr chhuah an tum tur thu a sawi.

Assam Rifles sawn chhuah chungchang hi hun rei tak chhung chu politics thu inchuh a ni ta a, a zia lo hle a ni. Aizawl khawpui aṭanga Assam Rifles sawn chhuah tur thu hi politics-a inhnialna a nih chhan ber pakhat chu, 'Kan sawn chhuak ang,' ti ṭhin an awm vang a ni ber mai.

Tih theih loh tur intiam fo hi sim a hun tawh a, inthlan dawn apianga Assam Rifles sawn chhuak thei bîk ni awm taka insawi an awm ṭhin hi, politics-a Assam Rifles an tel chhan chu a ni ber awm e.

Tunah chuan Assam Rifles chu an chhuak ta lo a, an chhuah loh chhan chu eng pawh ni se, tunah chuan 'dawt sawi' chu an awm ta ngei a ni. Term khat chhunga Assam Rifles sawn chhuak theia insawi te, an insawn chhuah dan tur nen lama sawi tawk lah bo lo, mipui hi min ngai mawl hle a ang ber.

Engpawhnise, Assam Rifles chungchangah hi chuan state sorkar aiin sorkar laipui lam an thu zawk tih a lang chiang tawlh tawlh a, hei vang tak hian Assam Rifles sawn chhuah hi politics-ah sawi rik ni tawh lo se, inthlan dawna an sawi tawh term tawp thlenga an la sawi reng hi chu mipui nuih a za palh ang e.