Sum sem a awm thei em?

November 7 hian Mizoram Legislative Assembly inthlanpui a awm dâwn a, inbuatsaihna pawhin a vawrtawp a thleng chho mêk. He inthlan awm turah hian political party hrang hrang chuan Mizoram People Forum nen inremna thuthlung an siam a, sum leh therhlo sem loh an rel.

Sum sem hi kan sawi leh ṭhin a, political party-te hi a sum sem zawkah kan inpuh tawn nasa hle. Hetih lai hian kuta man emaw a awm ngai meuh lo a, rinhlelh kai erawh an awm ṭhin.

Hmun ṭhenkhatah chuan mi rethei zawkte inah tute emaw vak kualin a takin sum fai an sem a ni thei a, chutihlaiin tunlaiah chuan internet kal tlangin a duh tan chuan a sem theih reng tawh.

Hetiang dinhmuna kan din tawh avang hian mipui kan pawimawh ta a, mipuiin sum kan hnar ngam a hun tawh. State ṭhenkhatah chuan, 'MLA tling turin chuti zat tal chu neih a ngai' tihte an sawi ri ṭhin a, hetiang dinhmuna kan din ve lohna turin kan ṭan rual a ṭul hle.

Mipui lamin politician-te sum sem kan lo la a nih pawhin, kan vote duhna ber sawn phah lo ila, sum hmangin vote i hralh lo ang u.