Statistics mumal lo kan tuar

March 1 aṭangin Mizoramah Food Security Act kalpui ṭan a ni dawn a, he mi hawngtu Food, Civil Supply & Consumers Affairs minister chuan, Mizorama FSA kalpui a nih lawk loh chhan chu statistics mumal leh rintlak tak neih loh vang a nih thu a sawi.

Mizoramah hian ration card lem leh rintlak lo a tam hle a, Supply Minister chuan, "Mizoramah ration card lem a tam em em a, ration card tibo tur hian department chuan unique ration card, thlalak tel siamin, ration card lem 30,000 chuang paih a ni thei dawn," tiin a sawi hial a ni.

Ration card-ah chauh pawh ni lo, thil dangah pawh hamṭhatna dawn theihna tur chi-ah hian document lem siam mai hi kan hreh lo a, sorkar lam pawhin thil finfiah hmasa loa document dik chiah lo pek chhuah pawh an hreh bik lo niin a lang. Tuna kan ram kalphung en hian document dik lo siamte hi thil pawiah kan ngai lo a ang hial a, hei hi hriat loh vang a nih theih rualin dikna kan duh tak tak loh vang a ni tel thei a, Mizo mipuite hian kawng engkimah dikna hi kan mamawh thar hle a ni.

Ration card dik lo hian thil tam tak a nghawng a, FSA kalpui a nih hnuah phei chuan kan buai phah hle dawn a ni. Chutih rualin insiam ṭhatna remchang a inhawng dawn a, tun hi ration card nei tur dik tak chauhin an neihna hun ṭhaah chantir ila, a dik lo paihna remchang a ni tel bawk ang. Sorkar document pawimawh a nih tawh ṭhin avangin kan intawngpawng ziah luh chiamte hian nghawng pawi tak a nei thei a, Mizoram mi leh sa dik lote phei chuan thil dangah ṭan chhanah neiin khua leh tui dik tak nia inziah luhna remchangahte an hmang fo a ni.

Mizoram sorkar hnuaia department hrang hrangte data leh statistic neih a inang lo ṭhin hi siam rem ngam a ṭha a, hei hian thil ṭhenkhatah chuan chânna leh hlohna a thlen a nih pawhin a dika awm ngam hi a ṭha a; hamṭhatna duh vanga mipui lamin document lem an siam ṭhin ang tho hian sorkar department lam pawhin sorkar laipui aṭanga hamṭhatna beiseiin data dik zan lo an siam ve ṭhin bawk a, statistic dik tak kan neih theihna turin mipui leh sorkar kan dik ngam a ngai ve ve a ni.