Myanmar aṭanga kuhva phurh luh

Champhai DC chuan Myan­mar aṭanga kuhva phurtute tan Khankawn police checkgate khârna thupek a chhuah. Champhai DC chuan kuhva lak luh avangin kawng rûk tam tak a awm phah a, Zokhawthara inkhung hranna hmun, Agriculture department plant paltlang loa thlai hrisel lo, natna hrik pâi, rannung leh hlo chi hrang hrang pâi lak luh a tam phah bakah kuhva phurh avangin kawngpui a chhe nasa a, lirthei chet velnaah harsatna a awm phah a, mipui, damlo leh sorkar mi, Champhai leh Aizawl inkara zinte tan harsatna a siam a, dan leh thupek kenkawh kawngah pawh harsatna a thlen nasa niin a sawi. 

Myanmar aṭanga kuhva phurh luh hi a hlawk­puitute chuan eizawnna atan an hmang a ni mai lo a, an hausak phah hle tih chu tlang hriat a ni a; nimahsela he eizawnna hi mipui nawlpui hi chuan an tuar niin a lang. Motor lianin rit tak tak phur chungin kawngpui an zawh a, hei vang hian Zokhawthar leh Champhai inkar bakah Champhai aṭanga Aizawl panna kawngpuite hi a tlo loin a chhe hma em em a, mipui nawlpuiin an tuar hle bawk a ni. 

Zep thu a cheng lo a, he eizawnna hi dan dik taka kalpui a nih leh nih loh thlengin sawifiah hleihtheih a ni lo a, ram pahnih kara insumdawn tawnna a nih avang hian eng dan hmang chiaha kalpui nge a nih pawh sawi chian a awm ngai meuh lo. Chhiah an pek dante pawh hi dan ang thlap a nih leh nih loh hriat chian a ṭha hle. Champhai DC sawi ang hian he sumdawnna hian thil ṭha lo tam tak a keng tel a, Myanmar leh Mizoram inkal pawhnaa kawng rûk tam tak a awm phahte hi a pawi takzet a ni. 

Mipui nawlpuiin an ngai­mawh si, mi tlem te hlawkna chauh ni bawk hi sorkarin an titawp hleithei lo leh harsatna a awm pawha a hnu lawka kuhva phurtute duh dan zawnga thutlukna a awm leh thuai ṭhinte hi thil mak tak a ni. 

Sorkar chuan mipui nawlpui ṭhatna a ngaihtuah ber tur a ni a, mi hausate sumdawnna hi mipui nawlpui tana hnawksak a nih chuan huaisen taka dan anga tihtawp ngam pawh a ṭha mai thei.