Minister ṭhahnemngaihna kha
PHE Minister chuan engineer-te fuihin, mipui tana hnathawka hlawh la an ni tih hre reng turin a fuih a; hlawh phu loa in leh lo nei ṭha an nih vanga mipuiin an hnung lama an nuih leh nuih loh inen lêt turin a chah.
Mizoramah hian engineer-te awmna sorkar department changtu minister-te hian engineer-te hi an fuih a nih pawhin ṭawngkam tluang pangngaiin an fuih mai ṭhin a, tun ṭuma PHE minister hi chuan a ruh langin engkim a sawi a, siam ṭhat duhna vang a nih ngei hmel e.
Engineer zingah mahni hnaa rinawm leh thawk ṭha em em ṭhahnem tak an awm a, heng mite hian fak an phu a, an phu ang fakna erawh an dawng lo fo. A chhan nia lang chu mipui hian engineer hi kan phek en a, engineer zingah mahni hlawh phu loa hausa an tam a, hnathawk ṭha tawk lo eng emaw zat an awm avangin a thawk ṭha chhunte pawhin fak an hlawh lo fo a, hei hi chu a pawi khawp mai.
Chutih rualin PHE minister fuihna thu hi engineer lam hian huatah la loin inen letna atan hmang se a ṭha khawp mai a, mipuiin engineer an hmuh dante pawh hi thlak a ngai a, chumi thlak theitu tur chu a engineer-te bawk hi an ni. Mipui nawlpuiin sorkar hnathawk hlawh zat inangah engineer-te hausa tura an ngai ngawt maite hi a fel lo a, he ngaihdan her remtir theitu chu engineer-te hi an ni.
Mizoram sorkar hnathawk zinga hnathawk nasa ber pawl chu engineer-te tho hi an nih hmel a, chuti chunga engineer-te'n sawisel an tawh leh chhan ni ṭhin hi chu engineer ṭhenkhatte vang a nih hmel. Sorkar sum eiruk hreh miah lo, hnathawh ṭha hmuh tur awm bawk si lo engineer hi an awm a, sorkar hna dik taka thawha neih phak loh tur in leh thil dang an nei bawk a, mipui tan chuan sawisel an nuam hle ṭhin.
Minister-in engi-neer-te a fuihna
ṭawngkam hi huata lak theih khawpin a chiang fek fawk a; nimahsela hei hi
ṭhahnemngaihna au hla niin a lang a, engineer-te tlawn ṭhin minister a nih loh hmel a, hei pawh hi hmasawnna anga chhiar theih a ni awm e. A pawimawh ber erawh chu engineer rualte hian minister ṭhahnemngaihna hi a takin bawhzui se, Mizoram hmasawnna ruhrel duangtu leh a taka hnathawktu chu engineer-te an ni si a.