Tlai khawhnua free wifi sawi thar
Aizawl Municipal Corporation (AMC) mayor chuan, Aizawlah free wifi a thara kalpui leh tum mek a nih thu tun hnaiah press mite zawhna chhangin a sawi a; free wifi chu Aizawl khawpuia hmun lûn laiahte a thara dah leh tuma hmalak mek a nih thu sawiin, "A hmaa company-te kha duh anga an rintlak loh avangin free wifi kal mek kha kan titawp. Tunah chuan tute nge rintlak ang tiin kan zir mek a, kan zo thawkhat tawh," a ti.
AMC inthlan dawna party hrang hrangte inzawrhna kha a inang tlâng hle a, ṭhalaite tuipui tâk free wifi pek intiamna kha a ni awm e. MNF lamin AMC-a thlan tlin an nih chuan Aizawla a thlawna internet hman theihna tura free wifi kalpui an intiam a, thlan tlin an nih hnu kum nga a ral dâwn tawhah an rawn sawi chhuak leh ta a ni.
Free wifi hi kalpui an la tum miah lo a ni lo a, kalpui ngei tumin hma an la tawh a, nimahsela an hlawhtling lo a ni. A nihna taka sawi dawn chuan AMC hi free wifi kalpui an tumna kawngah an hlawhchham let der a, mipui hmaa an intiam ang an pe thei lo a ni.
Tunah he AMC term hi a tawp dâwn tawh a, inthlang leh tura boruak a inmûn mêk laiin free wifi chu sawi chhuah a ni leh ta. AMC mayor chuan, "Tute nge rintlak ang an zir mêk," niin a sawi a, a zirchianna atan hun an seng rei ta mah mah deuh niin a lang. Mipui chuan an intiam ang ngeia ro an rel hun chhunga free wifi hman theih an duh a, an rorel hun tawp lama free wifi pe thei tur rintlak an la zir mêk hi chu a thlang tlingtu mipui zahlohna rawng a kai thei hial awm e.
Inthlan dawna intiamna hi a zavaia tih kim sen loh a awm thei a, nimahsela AMC kuta pawisa awm en hian free wifi pek hi thil harsa a ni hauh lo a, mipui hmaa intiamkamna zah lo ang maia term tawp dawna taka an rawn sawi ri leh hi chu voter ngaihsak loh vanga puh palh a awl dâwn mang e.