Vote thlâk vek tura inzirtirna

Vote nei zawng zawngte inthlanah vote thlâk tura inzirtirna, Systematic Voters Education and Electoral Participation Aizawl district leh leh Mizoram Cycling Association chuan October 24, 2023 (Thawhlehni) zing khan Aizawlah SVEEP Cycle Rally an huaihawt a, mi 85 lai an tel.

Kan hma lawka MLA inthlanpui lo awm tur pualin SVEEP hnuaiah hmalakna eng eng emaw a awm tawh niin a lang. Tun hnai lawka hman zawh tâk Anthurium Festival-ah pawh hmalakna kalpui a ni a, vote thlâk tura mipui ngenna leh sâwmna video clip-te pawh siamin an thehdarh tawh niin a lang.

SVEEP kaltlanga hmalaknaah hian eng ang takin nge sum an hman hre kîlh kêlh lo mah ila, sum séng lo chuan thil tih ngawt theih a nih a rinawm loh a; chuvangin, eng emaw zat chu an hmang ngeiin a rinawm. Sorkar hian MLA inthlanpui awm turah hian mipui, vote nei zawng zawngte'n vote thlâk vek se a duh tak zet tih a lang a, vote an thlâk ngeina tur pawhin insengsoin hma a la rêng a ni.

Election Commission of India pawhin vote thlâk a ngai pawimawh em em a, mi tinin vote an thlâk ṭheuh theih nan remchang a siam belh zel. Inthlan kan hmachhawn mai turah pawh taksa lama rualbanlote leh kum upate'n vote an thlâk ngei theih nan, polling station-a kal kher loa anmahni ina vote an thlâk theihmna tur ruahmanna a siam a ni. Service voter-te'n vote an thlâk ṭheuh theih nan kum danga la tih ngai loh ruahmanna thar a awm bawk.

Sorkar leh Election Commission-in vote thlak an ngaih pawimawhzia hre thar leh ila, voter zawng zawngin vote an thlâk theihna tura inzirtirnate hi ngai pawimawhin, vote thlâk ṭheuh tum ila; mi bikte tana awlsamna siam zawng zawngte hi a chhawr ṭangkai theitute'n bawhpelh loin hmang ṭangkai ṭheuh se a va lawmawm dawn em. Vote thlâk hi democracy atana pawimawh em em, ram kalsiam bul inṭanna pawimawh tak a ni tih hriain, vote thlâk vek turin rilru siam vek ila a duhawm hle.