Pawisa sem kan ṭhatpui em?

MNF president chuan, MNF-in Socio-Economic Development Programme (SEDP) policy ṭha tak an neihsa tuai thara thuam famkim zual turin an inbuatsaih tih a sawi a, "He policy hi kut hnathawktute din chhuahna tura chhungkaw pakhat hnenah Rs. 3,00,000 ṭanpuina tura duan a ni. Congress duh loh vang ngawr ngawr ni lo, MNF policy SEDP avangin MNF-in sorkarna kan siam ang," a ti.

Congress-in Mizoramah sorkarna an chelh mek a, an sorkar chhan lian tak nia sawi chu NLUP van a ni. NLUP hi kuthnathawktute dinhmun siam ṭhatna tura duan a ni a, a kalphung chu eng pawh lo ni se mipui hnena pawisa sem leh NLUP hi thil inzawm tlat a ni. Inthlan dawna Congress campaigner-te au hla chu Congress vote-tute tan pawisa ṭhahnem tak pek lêt a ni a, pawisa pekna hmanruaah NLUP hi an zuar a ni.

He thil hian hnathawk thei turin mi tam tak a siam lianin a tichak a, chutih rual chiah chuan a thlawna pawisa dawn beiseina a siam a, hnathawk loa sorkar sum sem dawn tum mi tam tak an awm. Mipui zingah mahni hnathawh hlawh ni lo sorkar aṭanga pawisa dawn beiseina lian tak a tuh a, he rilru hreisel lo hian nghawng ṭha lo tak a nei thei.

Tunah MNF-in inthlan lo awm tur thlirin pawisa sem lam bawk an sawi mawi ve leh a, SEDP hnuaiah chhungkaw pakhat hnenah Rs. 3,00,000 ṭanpuina pek an sawi ri ve leh ta. Thil lang chiang tak chu vote hmuhna a nih dawn phawt chuan a thlawna pawisa sem an hnial bik lo a, NLUP ang thoin mipuiah pawisa pek an tum thu an tlangaupui ta a ni.

Tuna kan din-hmun en hian a thlawna pawisa sem zawnga ei leh bara intodelh tura ṭan lak hi a fuh tawk lo tih a chiang tawh a, kan ram hian pawisa sem hi kan ṭhatpui lem lo tih chu kan ram dinhmun thlir hian kan hmu thei awm e.