Politics-a ringtu nihna lan chhuahtir

Mizoram MLA inthlanpui a hnai tial tial a, political party leh candidate tinte an ṭang em em tawh a; anni ai mahin party worker-te an ṭang mah zawk em ni aw, tih mai tur a ni bawk.

Political party leh candidate tinte'n inthlanah hian tlin ngei an duh a, an tlin theih nan nasa takin an ṭang a, theihpatawp an chhuah vek a ni. Kan ṭan em em karah hian thu dik lo te, thu dik kara dik tâwk lo deuh han belh hret ang chite sawi lo leh thehdarh lo tura kan fimkhur thar a ṭul chho mek.

Politics-a inbeihna a nih tâk avanga engkim tih thiang, thu dik lo sawia thehdarh pawh pawi lo, thil ṭha lo hrang hrang tih a rem ta emaw ti ni âwm taka thil sawi, thu thehdarh leh thil tih a sawm ta nual em ni chu aw, tih mai turin boruak a awm chho leh ta mek. Mi dang beihna atana mi thil sawi a chhumbunga thehdarhte pawh hmuh tur a awm nual tawh.

Candidate te, party hruaitute leh an mi leh sate leh anmahni ṭanpuitu zawng zawng te, mipui náwlpui thlengin kan fimkhur thar a ṭul zual ta hle. Kristian, Pathian ringtu, Pathianni leh hun danga nalh taka biak-ina inkhawm ṭhin kan ni tih hre reng ila, ringtu kan nihna hi politics-a kan ṭan luatna hian hliahkhuh lo se, ringtu kan nihna politics-a lan chhuahtirtu ni zawk thei ila a duhawm hle.

Kan ram hian Pathian tana rinawm tlat, Krista tana danglam ngam a mamawh a, chu mamawhna chhángtu ni thei tur chuan ram hruai tura inpe zawng zawngte'n rilru siam thar se a va ṭha dawn em!