Tuichhawngchhuah thil thleng

February 26, 2016 chawhnu lamah Tuichawngchhuah Primary School a kang a, he mi zan dan 11 vel hian police-te'n Mizo Students Union (MSU) hruaitu pakua an man a, a tukah chhuah an ni. MSU thuchhuah chuan, an hruaitute'n Tuichawngchhuaha in pakhat an ṭhiahsak hnuah chawhnu dar 2 velah khua an chhuahsan a, khua an chhuahsan hnu chawhnu dar 3 velah sikul hi a kâng tih an hriat thu leh pawi an tih an tarlang. Hemi tlai la la hian Mizoram Chakma Alliance Against Dis-crimination (MCAAD), Delhi intite'n sikul kang hi MSU tihah puhin thuchhuah an siam a, hei hi media hrang hrangah a darh.

Tuichhawng-chhuah thil thleng hi ngun taka ngaihtuah chi a ni a, haw hawa nawr chiam chi niin a lang lo. Tun hnaia Tuichhawngchhuah Primary School kang hi hal ni ngeiin a lang a, a haltu hi finfiahna nei an awm a nih chuan police hnenah hriattira man ngei tur an ni ang a; nimahsela rin thua inpuh ngawtna tur chi niin a lang lo.

Thil chhhut ngai deuh mai chu Tuichhawngchhuah hi thingtlang hmun kilkhawr tak a ni a, a nihna takah chuan khua pawh ni loin dan loa mi ṭhenkhat awm khawmna mai a ni. He khuaah hian zirlai hruaitu ṭhenkhat an kal a, zirlai lam thuchhuahin a tarlan danin an haw hnuah Tuichhawngchhuah Primary School kan thu hi an hre ve chiah a ni. Hemi ni tlaiah hian Delhi lama awm daih Chakma pawlin MSU-te thiltiha huaisen taka an puh nghal ngawt thei pawh hi finfiahna an hria a nih loh chuan thu an ngam hle a ni.

Thingtlang khaw pilrila chawhnu lama thil thleng, a thlen ni tlaia Delhi lamin an lo hre nghal leh thuchhuah an siam rang lutuk hian ngaih a tiṭha lo a, anmahni lamin awmze nei takin thil an kam lawk emaw tih palh awl tur khawpin an zualko rang a ni. Engpawhnise Tuichhawngchhuah Primary School kangah hian ngaihdan inang lo tak pahnih a awm a, pakhat chu Chakma lamin MSU-te halah an puh a, MSU lamin an haw hnua kang a nih thu an sawi ve thung.

Thu inchuh a awm-lai hi chuan haw hawa thil nawr a hun lo a, thuneitu lamin dan hmangin thiam takin chhui zui se a fuh ber ang. Chutihlaiin Joint NGO Co-or-dination Committee chuan Tuichawng-chhuah chu dan loa din a nih avangin ṭhiat thuai turin sorkar an phût a, hengte pawh hi sorkar hian a bawhzui ran a ṭha khawp mai.

Khawi hmunah pawh thil thleng a awmin hnam leh hnam, chi leh chi zawnga lak loh a ṭha ber a; tun hnaia Tuichawngchhuaha thil thlengte pawh hi police lamin chhui se, hal a nih ngei chuan a haltu an finfiah hnuah man se, finfiahna awm loa inpuh ringawt erawh thil dik ber a ni lo ang.