AR insawn chungchanga thu inchuh

Tun hnai lawkah Assam Rifles mi leh sate'n Aizawl khawpui laili aṭanga an insawnna tur Zokhawsang cheibâwl chungchangah Mizoram sorkarin a tih turte a la tih kim loh thu leh Zokhawsang chu a nih tur ang a la nih loh avangin insawn theih a la nih loh thu an sawi a, chanchinbuah tarlan a ni.

A hnu lawkah Mizoram sorkara Home Secretary-in Mizoram sorkar hmalaknate a sawifiah ve leh nghal a. Zokhawsanga AR hmunhma cheibâwlnaah Mizoram sorkarin a tih tur ang ang a tih kim vek tawh thu te, AR insawnna tura inremna thuthlung ziah tur duanah AR leh Mizoram sorkar ngaihdan inang lo a awm nual thu te, Home Ministry kaihhruaiin AR hotute nen Delhi-ah inbiak an rawt thute a sawi a ni.

AR lam sawi leh Home Secretary sawi hi a inang lo hle mai a; Mizoram sorkarin a tih tur ang ang a tih vek tawh thu Home Secretary-in a sawi laiin, AR lam chuan Mizoram sorkarin a tih tur a la tih kim loh thu an sawi thung a, a inpersan viau mai. A hmain Chief Minister leh minister ṭhenkhatte'n AR hoin insawn an hreh avangin chhuanlam an zawng kual niin an lo sawi tawh ṭhin bawk. Hengte ngaihtuah hian AR-te hi Aizawl khawpui aṭangin an la insawn chhuak mai dawn lo niin a rin theih.

Mizoram sorkar hotute leh AR lam hi media kaltlangin an intâwng angin a ngaih theih deuh roh a. Mipuia thiam chan tumna nia ngaih theih tura thiam thu sawi angte pawhin a ngaih theih a ni. Mi ṭhenkhat chuan politics-a hlâwkna hmuh tum rànin thil an sawi kual ṭhin ni pawhin a lang.

AR insawn tur chungchangah hian dik zawk nia an inhriatnate media kaltlanga sawi kual mai mai loin, hmachhanah sawiho thei se, a ṭul a nih chuan a hmunah pawh enhoin, hmabak la awmte thlirho thei se a duhawm hle mai; chu chuan thil ṭha zawk a thlen ngeiin a rinawm.