Politics-a ngaihdan inkalh

MNF chuan tun hnai khan Mizoram independence an puan kum 50-na (Golden Jubilee) an lawm a; Congress ṭhalai leh MPC ṭhalaite chuan MNF-in Mizoram independence-a puan champha ṭum 50 na an lawm chu zahthlak an tih thu an tarlang ve thung. 

Political party-te hian ngahdan hrang leh pawm dan inang lo tak tak an nei ṭhin a, chung zinga langsar tak pakhat chu MNF ram mut thu hi a ni ngei ang. MNF lam chuan independence hial puangin an nun an hlan a, mi tam takin an vanglai hun chu ram leh hnam tan hlanin thil tam tak an chân phah. Thlirna dang aṭanga thlirtute erawh chun MNF hi independence pawh sual tak tak loah an puh ve thung a, ngaihdan a inkalh hle a ni. 

Politics-ah hi chuan pawm dan dik tak nia an ngaih ve ve, chutihlaia thil letling thawk ni si hi a awm a, hei hi politics tingaihnawmtu tak pawh a ni. Politics-ah chuan 'dawta inpuh' kan tih ṭhenkhatte hi chu a puhtu lam chuan dawt angin an ngai bik lo a, an ngaihdan leh thlir dan a inan loh vang a ni chawk. 

Engpawhnise tun hnaia MNF-in an lawm, kum 50 kal taa independence an puante pawh hi anmahni lam chuan thil ropui leh chhinchhiahtlak, Mizote tana hun ropui ber pawlah an ngai. Eptu lam ṭhalaite erawh chuan thuchhuah siamin hlawhtling loa independence an puang chu thil zahthlakah an chhuah ve thung a; a tawn tawn hian thu dik tak sawiah an inngai ve ve si ang. 

He thil aṭang hian politics-a ngaihdan leh pawm dan a inan loh theihzia a zir chhuah theih a; nimahsela eng political party pawh ni ila kan dah pawimawh hmasak tur chu ram leh hnam ṭhatna tur a ni. Politics-ah ngaihdan inang lo awm ṭhin mah se, rorelna vawn fung chelhtua ṭangte chuan an rawngbawl sak tur Mizo mipuite tan an thawk tur a ni a, chu chu politician-te bat a ni e.