Sava veh

Environment & Forest minister Lalrinmawia Ralte chuan, tun hnaiah mi ṭhenkhatin China airgun, enlenna invuah hmanga sava tam tak an kap hlum chu thil pawi tak a nih thu a sawi a; district commissioner-te sava leh nungchate humhalhna thupek an chhuahtir chuan ngaih pawimawh a hlawh loh chuan dan khauh zawk leh hun rei zawk daih tur khapna thupek tihchhuah leh a nih tur thu a sawi.

Tun hnaia thil thleng hi a pawi hle mai a, Mizoramah nungcha humhalh kan inzirtir meklaia tunlai thiamna hmanga nungchate suat an ni hi a ṭha lo takzet a ni. Nung-cha humhalh duhtu an pung zel a, ṭhang-thar zingah ngat phei chuan savate hi tihhlum ena en lo, an sa pawh ei duh lo an pung zel a; nimahsela hetihlai hian sava vehna hmanraw ṭha zawk a lo chhuak ve mek bawk a, a vanduaithlak hle a ni.

Mizoramah hian ram ngaw kan suat nasat avangin sava hi an tlem tawh hle a, tun hnaia nungcha humhalh inzirtirna a kal chak deuh hnu hian sava hmuh tur an awm leh ṭan. Hun rei tak chhung khawpuia sava hram hriat tur a awm loh hnuah khawpui daifem lamahte pawh sava hmuh tur an awm leh ṭan a, sava humhalh duhna pawh a lian chho mek zel a ni. Hetih hunlai taka sava veh ching an lo chhuak thar ve leh chiah hi an demawm a, hei hi chu sorkar pawhin a ngaimawh a, hetiang mite hi ven hneh an nih ngei theihna tura ṭan lak a ngai.

Nungcha humhalh chung-chang sawi a nihlai hian khaw tam takah ualau takin sava leh ramsa ṭhenkhat sa lei tur a awm ve reng bawk a, silai tung tura kan infuihlai mekin ṭhenkhatin eizawnna ang deuh thawin sapel turin ṭan an la ve mek bawk. Luia nungcha humhalhte pawh hmun tam takah entawntlaka kalpui a nihlaiin hmun
ṭhenkhatah chuan ualau takin bomb leh thil ṭha lo dang hmangin sanga an la mek tho a ni.

Tun hnaia sava veh ṭhinte thil tih hi ram tan a pawi a, sorkarin chak taka ṭan a la zui nghal hi an fakawm a, hei hian khawtlang hruaitute kang kai se, Mizorama savate humhalh hi Mizote kutah a awm a, tun hnaia silai chhuak thar hmanga sava veh ṭhin hi tihtawp ni rawh se.