Tourism kan sawi ngun ta e!

Chief Minister chuan, "Industry lian nei lo mah ila tourism industry din theihna ṭha tak kan nei," a ti a; pi pute rohlu tidanglam lo a, a nihna ang anga humhalh chu khualzinte hmuh duh a nih avangin humhalh a ṭul thu a sawi.

Mizoramin tourism lamah theihna (potential) sang tak a neih thu hi kan ngaithla ngun ta hle mai a, a bikin Mizoram rawn tlawhtu mikhualte'n an sawi kan hre fo. Tun hnaiah Mizoram sorkar mi pawimawhte pawhin tourism aṭanga sum lakluh theih a nih thu te, khualzinte pawhin khualzin mite tana tlawh chakawm khawp ram mawi leh nuam kan neih thute sawi a ni ṭhin.

Kan ram hruaitute'n tourism-a theihna kan neih thu sawi a nihlai hian kan state ṭhenawmte chuan a takin an kalpui mek a, sum ṭhahnem tak an hai lut tawh bawk a ni. Mizoram ṭhenawm maiah Nagaland, Assam, Meghalaya, Arunachal Pradesh leh Sikkim-te pawhin tourism aṭangin sum ṭhahnem tak an lalut hlawm a, Mizoramah erawh Tourism department-te'n sorkara sum an chhun luh a la tam tham lo hle a ni.

Tourism hi chak taka kan kalpui ve a hun tawh a, kan thil neihte pawh kan pholan a, kan zawrh a, khawvel dangte kan hrilh hriat thiam a ngai. Chumi tur chuan ngaihtuahna thar ṭha zawk kan neih a ngai a, tuna Toursim department kal dan ngai ringawt hi chu a tawk lo tih a takin kan hmu mek a ni.

Sorkar hian Mizoramah tourism aṭanga sum hailuh a tum tak tak a nih chuan zau zawka inzir chungin ngaihtuahna seng se, tuna tourism lama kan kalphung hi thlak a ngai a, a sawia sawi mai loin a taka kalpui a tum ta.