Bru hruai kir bawk chu!

Ministry of Home Affairs (MHA) chuan Tripura refugee camp-a awm mek Bru-te chu Mizorama an kir leh dan tur ruahmanna siam turin Mizoram sorkar a hriattir.

Tripura-a raltlan mek Bru-te hi vawi tam tak Mizorama an lo kir dan tur ruahmanna siamsak an ni tawh a, a la hlawhtling lo. Mizoram sorkar lam chuan an tih tur an ti tawh a, sorkar laipui duh dan angin Bru-te kir dan tur ruahmanna hi an siam fo ṭhin a, Bru lam hi an kir duh lo.

Bru an kir loh chhan lian tak nia lang chu thil phut an neih vang leh Mizorama him dawn lo nia an insawi vang a ni. Mizoram aṭanga anmahni duh thua tlanchhia Bru-te hi sorkar laipui mitah chuan hlauh neia tlanchhia an ni ngei a, an hlauh chu Mizorama mipuite an ni. Heng mite hian Mizo mipuite hi hlauhawm tak, an kianga cheng ve hnam dangte diriama harsatna siamsak ṭhintuah an puh a ni ber mai.

Thil chiang tak kan tawn mek chu Mizoramah hian Bru tam tak an awm a, heng mite hian tun hnaiah harsatna an tawh hriat a ni lo. Hetiang a nihlaia Tripura-a Bru awmte'n Mizorama lo kir an duh loh chhana a ralmuang lo anga an sawi leh ṭhin hi Mizo mipuite zah lohna ang hialin a puh theih ang.

Hei bakah hian Mizorama hmun khata awm khawm a, eng inthlanah pawh awmze nei thama awm khawm an duh a, hei hi Mizoram tan thil hlauhawm tak a ni thei. Tri-pura-a awm mek Bru-te hi Mizoram hmun hrang hrang aṭanga kal an nih angin an chhuahna khuaah emaw, a chhehvel hmunah emaw chauh an kir hi Mizoram tan thil ṭha zawk a nih hmel.

Bru-te lo kir dan tur hi ruahmanna awm ṭhin a, heng ruahmannate hi a fel lohna hriat ni si loin Bru lam zawk hi an lo kir duh lo ṭhin a ni. Bru-te hi an duh ang thlapa an kir dan tur ruahmanna siam a nih hma chuan an kir duh lo zel dawn a nih chuan a fel lo hle mai a; Mizorama Bru-te kir dan tur ruahmanna hi Tripura-a Bru-te tan ringawt ni loin Mizoram chhunga chengte tana ṭha leh hnawksak lo a ni ngei zawk tur a ni.