Ruihhlo kan do dan hi

Central YMA hnuaia ruihhlo dotu pawl, Supply Reduction Service (SRS)-te chuan April 11, 2015 leh February 19, 2016 chhungin pawl leh kohhran hrang hrang aṭangin ṭanpuina Rs. 13,61,450 an dawng a, Rs. 12,75,667 an hmang ral tawh. He mi hun chhung vek hian SRS hian ruihhlo Rs. 9,00,50,600 man an man tawh bawk.

Ruihhlo avangin Mizoram hi a buai a, kan ṭhalai tam takin an thih phah tawh a, ṭhalai ṭhenkhatin midangte phak loin nun hrehawm takin an hmang mek bawk. Ruihhlo avangin chhungkaw tam tak a keh chhia a, an rûm a, ruihhlo hian Mizo tam takte hi an nih tur ang a nihtir phak lo a ni.

He ruihhlo hi a ṭhat lohzia leh kan ram hmelma a nihzia kan sawi ṭhin chungin kan khawpuiah ngei ualau taka zawrh ngam a ni a, ruihhlo zuartu ni ngeia kan hriatte pawh kan en liam mai a, khawtlang leh dan leh thupek kengkawhtu lam pawhin an ngaimawh tak tak lo. CYMA-in ruihhlo do kum a puang a, SRS a din a, thawm na tak neiin ruihhlo do hna a thawk a, an buan hi a len tham avangin an che nâ a, tharum nen an ṭan chang a awm a, ruihhlo pawh a rem deuh duak hman a ni.

Tun hma deuh kha chuan ruihhlo do tura pen chhuak an awm ngai lo a, a thua kan duh lo kha a takin kan ti ngai lo. CYMA-in ṭan a lak hnuah mipui nawlpuiin ruihhlo doin ke an pen a, SRS a din hnuah awmze nei deuhin SRS kaihhruaina ni siin ruihhlo doin mipui an ṭang bawk. Tuna a thawh hnihna atana din SRS-ah hi chuan thil awmze nei zawka kalpui a ni tawh a, a tiṭhang leh a hmangchang hre deuhin ruihhlo do hna hi a takin an kalpui a, mipui nawlpui chu an tel ve tawh lo.

Mizo mipuite tana ruihhlo do dan ṭha leh awlsam chu a taka ruihhlo do hnathawktu SRS-te ṭanpui hi a nih mai hmel a, hei hi kan intihhmuh zel a ṭha. Sorkar meuh pawhin SRS-te hnathawh hi ṭha tiin ṭanpuina a pe a ni a, SRS-te kan ṭanpui hi ruihhlo kan do dan kawng ṭangkai leh awlsam a ni tih i hre thar zel ang u.