Khawlaia zu in

Mizoram police chuan thuchhuah siamin, Mizoram Liquor (Prohibition and Control) Act, 2014 (MLPC Act) Section 42 (3) hnuaiah khawlaia zu in khap tlat a nih thu an tarlang a, "MLPC Act hman a nih tâk avanga zu in leh rui khuahkhirhna awm lo ang maia ngai a, mipui vantlang mit tikham khawpa che an awm fo niin a lang. Dan hriat fiah tâwk loh vanga buaina tawh loh nan leh khawlaite mipui vantlang tana a thianghlim zawk nan Aizawl khaw chhungah police-te'n hma thar kan lak dawn avangin, mi tinin dan kan hriat fiah lehzual nan kan inhriattir nawn a ni," an ti.

Mizoramah dan angin zu zawrh a ni ta a, tun hnaiah khawlaia zu in leh zu rui hmuh tur an awm ta zauh zauh mai. Puipun nikhuaa midangte tana hnawksak khawpa zu ruite pawh hmuh tur an awm zauh ṭhin a, hengte hi dan anga hrem zel ni se a ṭha khawp mai.

Sorkarin MLPC Act a hman dawn khan a nghawng theih thilte hi chik takin a lo zir tawh ṭhin ang a, chung zingah chuan khawlaia langsara zu in an awm turte hi chu rin lawk theih chiang tak zinga mi a ni. Tun hnaiah langsara zu in an awm ta hi sorkar thiam loh a ni a, dan bawhchhiate chungah dan angin ro a rel ngei tur a ni.

Hei mai hi a ni lo, tun hnaiah Aizawl khawpuiah ruihhlo ti ṭhin ṭhen-khaten midang pawh zah loin khawlaiah ganja-te an zu ngam a, inchiu ngam hialte pawh an awm niin an sawi. Tun hma chuan ruihhlo ti turin hmun biru deuh an pan ṭhin a, zu in tur pawhin a langsar lo an chuh hram hram ṭhin. Tun hnaiah mipui vantlang tana harstana siam khawpa ruih chingte an zalen a nih chuan, sorkar tan mualphona a ni thei ang.

Police lamin mipuite hnenah khawlaia zu in leh zu ruia buaina siam khap a nih thu an puangzar nawn leh hi thil lawmawm tak a ni a, an thupuan hi a takin bawhzui se, dan loa chete chungah dan anga kal ngam a hun tawh a ni.