Inthlan campaign kar tawpna

Mizoram Legislative Assembly inthlanpui chu November 7 hian neih a ni dâwn a, tun kar bâk hi inthlan campaign theih a ni tawh dâwn lo.

Inthlan awm apianga an sawi ṭhin chu 'last minute' tih hi a ni a, inthlan dawn hnaiah hian pawisa leh therhlo an sem ṭhin tih hi sawi dan tlangpui a ni.

He kan thil chin ṭha avang hian inthlan dawnah hian pawisa lêng vêl um chi hi an awm ve bawk a, a semtu leh a dawngtu an awm tihna a ni. Mipuite hi an dinhmun a chhiat avangin pawisa lêng vêl hi dawng lo thei lo dinhmunah an ding ṭhin a, hei tak hi hre fuhin politician hian mipui vote lei an tum ṭhin a, a vanduaithlak hle a ni.

Inthlan a hnaih tak tak chuan political party tinte an inlawm luh tam siak a ni ta ber a, mipui nawlpui tán pawha awih ber tur hriat a harsa ṭhin. Inthlan dawn hnaiah hian inlawm luh a tam chhan chu pawisa lêng vêl a tam vang a ni pakhat a, a fel lo hle a ni.

Politician lam hi chu tlin an duh avangin tih hreh nei loin an che tawh ṭhin a, dan bawhchhiat pawh hreh mang lo an ni ṭhin a, mipui lam tal hi kan fîm a ṭul khawp mai.

Inthlan kar tawp ber kan thleng ta a, kan ram dinhmun hre rengin politician-te lam an fîm thei lo a nih pawhin mipui lam tal hian a dik leh dik lo thliar hram hram ila, he ram damna tur hian 'last minute' an tih hunah hian kan zavaia kan thawhho a ngai a ni.