Khawpui ṭhalaite intihhlimna

Aizawl DC hoa sorkar mi pawimawhte ṭhukhawm chuan, naupang leh ṭhalaite'n intihhlimna an neih theihna atana Inrinni chawhnu lamah Zodin traffic point leh dak-inpui inkar chu No Vehcile Zone-a puan ṭhin ṭha an ti.

Sorkar mi pawimawh ṭhu-khawmin Aizawla traffic kal dan tidanglam si loa puipunna hmun thawl ṭha siam an tum niin a lang a, naupang leh ṭhalaite intihhlimna tur an ngaihtuah hi a lawmawm hle. Aizawl khawpui hi a tira ruahmanna awm miah loa din a ni a, hmun awl remchang apiangah in an sa a, khawpui dang angin intihhlimna tur hmunhma pawh a awm meuh lo.

Hetihlai hian khawpuia park awm chhun chu ruihhlo ti ṭhinte leh mi awm ṭha duh lote tawm bukah a chang thawthang tawh a, tun hnaiah NGO lamin ṭan an han la deuh a, chuti ni lo se Aizawl City park hi a ṭawp tawh hle ang. Sorkar hotu lian ṭhukhawm hian hengte pawh hi an sawi chhuak turah ngai ila, City Park venghimtu tur hi an dah thei awm si a, ngaihtuah tel ngei rawh se.

Khawpui ṭhalaite tan hmun-hma a zim thu kan sawi rual hian, hmunhma awm chhunte enkawl zui leh chhawr ṭangkai dan inzirtir tel pawh a ṭha hle. Khelmual leh infiamna hmunhma ṭhenkhatte pawh hi sorkarin a siam a, enkawltu mumal awm mang loa hnutchhiah a ni leh ngawt ṭhin a, a pawi hle. Ṭhalaite intihhlimna tur a thar kan dap rual hian, kan neih ang chhun chhunte vawn thianghlim a, hmantlaka kan chhuah hi a ṭul khawp mai.

Ṭhalai ṭhenkhat-in ruihhlo an tih chhuanlama intih-hlimna hmunhma awm lo an puh ṭhin erawh pawm dan tawk thiam a ngai a, an ṭhalaipui dangte pawhin intihhlimna hmunhma an nei a ni bik lo a, ruihhlo an ni ve kher lo - mahni sualna leh thiamlohna khuhna tura midangte dem a,
ṭhalaite chêp ta riaua inngaihte hi thlir dan tawk thiam a ṭul hle.

Khawpuia ṭhalaite hian intihhlimna tur hmunhma an nei ṭha tawk lo a, chutihlaiin lirthei tlanna kawngpui lunlai khera hmun siamsak tum hi chu thil fing ber a ni lo thei a; rawtna mai a ni a, an hman chhin hunah a lo ṭha phian thei a, ṭhalaite tana ngaihtuahna an seng hi thil lawmawm tak chu a ni phawt e.