Dân kengkawh thei sorkar

MZP chuan October 28, 2023 (Inrinni) khan Aizawla hmun hrang hrangah hnam dang, dan loa khawsate dap chhuah hnatlang an huaihawt a, inner line permit nei lo mi 78 leh kum tling lo hna thawka chhawr eng emaw zat an hmu chhuak a, dan anga bawhzui turin sorkar thuneitute kutah an hlan chhâwng a ni.

MZP hian tun hma pawhin Mizorama hnam dang awmte zingah ILP nei lo leh permit thi tawh an awm leh awm loh an lo endik fo tawh a, permit nei lo leh thi tawh tam tham tak an lo hmu chhuak tawh ṭhin. YMA pawhin hma lain, dan loa awm hnam dang eng emaw zat an lo man chhuak tawh ṭhin bawk. Chu'ng an hmalaknate chuan awmzia nei ve bawk mah se, awmzia a nei tâwk lo a nih a rinawm; tun thlengin man chhuah tur an la awm zel a ni.

YMA emaw, MZP emaw, tlawmngai pawl dangte pawh ni se, ILP nei leh nei lo dap chhuah hi an tih tur a ni hauh lo a, danin a phalsak hek lo. Mahse, danin phalna a pek sorkar mi leh sate lamin an bawhzui ṭha lo a ni ngei ang a, ṭhahnem an ngai bawh si a, hma an la leh mai ṭhin niin a lang.

ILP chungchanga danin thuneihna a pek ni hauh lo NGO-te'n hma an la ṭhin hi a lawmawm em em rualin, a lawmawm lohna lai a awm ve tho bawk. A chhan chu, dan a lal lohna hmun, dan kengkawhtute vuaichàzia lantirtu, dan ang taka thil a kal lohzia lantirtu a ni tlat.

Inthlang turin kan inbuatsaih mek a, mipuiin sorkar ṭha zawk an beisei mek. Eng party pawhin sorkarna chang se, dan ngai pawimawh sorkar, dan kan neihte a nih ang taka kengkawh ngam leh kengkawh thei sorkar siam turin inbuatsaih mawlh teh se.

Mipui pawhin inenfiahna tur kan nei ang; hna thawka chhawr tur hnam dang lak luh leh enkawl zui zelnaah dan ngai pawimawhin, dan ang taka thil tih tum ṭheuh ila a ṭha ngawt ang.