Vigilance Week leh corruption do

India ram pumah Vigilance Awareness Week hman mek a ni a, Mizoramah pawh October 30, 2023 khan hmun hrang hrang hman niin, eirûkna leh hlemhlêtna laka fihlîm tur leh do tur te, ram tana inhlan thar turtein sorkar hnathawkte an intiam a ni.

Kumina Vigilance Week thupui chu 'Say no to corruption, commit to the nation' (Hlemhlêtna hnâwl la, ram tan inhlân rawh) tih a ni. Nikum khan thupuiah 'Ram hmasawn nan corruption awm lohna India' tih hman a lo ni tawh bawk.

Vigilance Week puala sorkar hnathawkte intiamna (integrity pledge)-ah hlemhlêtna do tlat te, sorkar dan leh thupek anga dik leh felfai taka hna thawh te, nungchangah leh hnathawh danah mi dang entawn tlaka awm te, hlemhlêtna thil hmuh leh hriatte ngawihbosan mai loa sorkarah hriattirte a tel. Hetianga an intiam hi a lawmawm tak zet a, a taka bawhzuitu leh tihlawhtlingtu an nih ngei mipuin kan beisei.

Hlemhlêtna hi mi tlemtê hlâwkna tura mipui tawrhna thlentu a ni a, ram hmasawnna tiṭhuanawptu a ni a, a chimawm em em. Mipui chan ái leh thil a nih tur ang ni thei lo khawpa sum tihchingpente hi kan ti loh tawp tur a ni a, kan do tur a ni bawk.

Sorkar hnathawk kan ni emaw, ram hruaitu MLA/minister kan ni emaw, contractor leh supplier kan ni thei; Pathian ringtu, Kristian, biak-ina inkhawm ṭhin kan ni tih hre reng ila, corruption laka fihlim turin inhlan thar ṭheuh thei ila a va ṭha awn em. Kristian dik tak, Pathian ṭih tak taktu leh ram leh hnam hmangaihtu dik tak chu eirûkna leh hlemhlêtnaah a inhnamhnawih ngai lo ang.