Inthlan vote chhiar ní chungchang

Election Commission of India (ECI) chuan Mizoram Legislative Assembly inthlanpuia vote tlate chhiar hun atan December 3, 2023 an ruat a ni tih kan hria. Vote chhiar ní tura ruat hi Pathianni a nih avangin Mizorama páwl hrang hrangin an duh loh thu leh, Pathianni leh Inrinni ni loa sawn tura ngenna ziakin ECI-ah an thlen a ni.

Ngenna thlentute zingah hian Mizoram Kohhran Hruaitute Committee (MKHC) te, Mizoram People Forum (MPF), NGO Coordination Committee leh political party hrang hrangte an tel.

Vote thlâk ní sawn tura pawl hrang hrangin ECI hnena ngenna an thlen aṭangin hun a kal leh viau tawh a, mahse, tun thlengin chhànna a la awm lo. Chuvang chuan MKHC chuan hmalak zel dan tur ngaihtuah ṭha an ti a, anmahni maia hma la lo a, tlawmngai pawl leh political party hrang hrangte nen inthuruala bawhzui ṭha an tih avangin vawiin hian inhmuh khawm an rawt a ni.

Inthlan atana inbuatsaih dan enfiaha ECI hotute an rawn zin ṭumin pawl ṭhenkhatin vote thlak ni leh vote chhiar ni atan Pathianni leh Inrinni ruat lo tura an lo ngen lawm lawm chunga ECI-in vote chhiar ni atan Pathianni an rawn ruat chat hi a mak khawp mai a, dem theih tak pawh a ni.

Pathianni ber khera vote chhiar hi Mizorama pawl lian zawng zawngin an duh lo a, Pathianni leh Inrinni ni loah sawn ni se an duh vek niin a lang a; hei hi mimal ang pawhin mi tam zawk duh dan a nih a rinawm.

Chuvangin, pawl hrang hrangte hian an duhnate a hlawhtlin theihna tura bawhzui dan tur rèl an tum hi a àwm em em a. Vawiina pawl hrang hrangte inhmu khawm tur hian vote chhiar ni sawn chungchangah khauh zawk leh awmze nei zawka hmalak zui dan tur rêl chhuak ngei se a duhawm hle a, an rèl ang ang chu Mizoram mipui pawhin ṭha taka kan zawm a ṭul àwm e.