Thuthlung bawhzui leh zawm

MLA inthlanpui a hnai tial tial a, political party, candidate leh party worker te an ṭang na tial tial. Chutiang karah chuan inthlan a thianghlim theihna tura hma latu leh thil ṭha lo vêngtu Mizoram People Forum (MPF) hnawk titute thâwm pawh hriat tur a awm fo.

Mi ṭhenkhat chuan an tih duhte khapsaktuah MPF an puh ṭhin niin a lang. MPF-in an phal loh anga sawi tam ber hi chu MPF phal loh ni loin, MNF leh political party-te'n an phal loh tlàn, an thawhhona thuthlungin a phal loh a ni zâwkin a lang. 'Phal loh' an tihte hi MPF thuchhuak ni loin, thawhhona thuthlungin a phal lohte a ni tlangpui a, chu thuthlung chu party zawng zawngin an pawm leh remtih thlap, an president ṭheuhte'n hming an ziah hnan thlap a ni.

Mi tam tak chuan MPF hrim hrim bakah, MPF leh political party-te thawhhona thuthlung hi hnawksak an ti niin a lang. Hnawk an tih chhan chu–thil ṭha lo leh mawi lo an tihna tur a dâl tlata hriat vang leh tun hmaa inthlan boruak ni deuh hup hup ṭhin a reh tâk deuh vangte niin a lang bawk.

MPF hruaitute chuan, thawhhona thuthlung chu MPF-in party-te a barh luih a ni lo a, an sawiho fê hnua an pawm tlân a nih avangin thuthlung tihlawhtlin leh kenkawh pawh MPF chauh ni loin, party-te mawh a nih thu te, thuthlung a hlawhtlin theih nan party-te nen an ṭan tlàn a ṭul thute an lo sawi tawh a ni.

Political party mite hian MPF nena an thawhhona thuthlung hi MPF bawhzui leh kenkawh tur bik ni loin, an bawhzui tur, an kenkawh tur, an zawm tur a ni tih hre thar se a duhawm khawp mai a; mipui pawhin an hriat chian a ngai bawk.

MPF hmalakna hi a zavaiin hlawhtling vek lo mah se, inthlannaa thil thianghlim lo awm turte nasa takin an vêng ngei a; thil dik lo tih tumte an tìm phah a, Mizo nun ze mawi leh Kristian nun bosal lutuka chêtna turte a véng a, Mizo hnam leh ram tan thil hlu tak a ni.