Hnathawktute an fimkhur a ngai

National Food Security Act (NFSA) hman ṭan taka ration card pek chhuahah, chhungkaw hrang hrangte pian ni leh thla a dik lo nasa hle. Food Civil Supplies & Consumer Affairs (FCSCA) Minister chuan, ration card dik lote chu siamṭhat a nih tur thu a sawi.

Hun rei tak chhung an inbuatsaih hnuah Food Security chu hman ṭan a ni ta a, hemi atana ration card siam tharah hian chhungkaw member-te pian ni leh thla a dik lo nasa a; January 1-a piang an tam hle. Pian ni leh thla bakah, pian kum dik lo leh hming dik lo a tam hle bawk.

Heng thilte hi siam ṭhat leh theih chu a ni ngei mai a; nimahsela hnathawktute fimkhur loh avang hian sorkarin sum tam tak a seng thlawn a, hun tam tak paih a nih bakah mi tam takin harsatna an tawh phah a ni. Hetiang thil pawimawh tak ni si tih dik loh a tam lutuk hi a zia lo hle mai a, sem chhuah a nih hmaa an hmu chhuak lo ringawt pawh hi hnathawktute dem loh theih a ni lo.

Sorkar hnathawk zingah a thawk rim leh buai ber pawl pawh an ni mai thei a, thil thar kalpui a nih vangin FCSCA-a hnathawktute hi midangte ai pawhin an buai bik ang. Hei vang hian an thil tihsual hi sawi mam theih a ni lo thung a, buai chung chung pawhin an buai chhan tak hi chu fel takin an ti thei tur a ni a, he thil tihsual palh tam lutuk hi chu thuneitu lamin an chhui chian a ṭha khawp mai.

Thil dangah pawh hnathawktu in-thlahdah leh tisualte hrem an ni a, ṭhenkhatte phei chu hriat loh vanga tisualte pawh an ni. Tun hnaia ration card-a dik lo tam lutuk hi chu inthlahdah vanga puh loh theih pawh a ni lo a, hmun hrang hrangah tihdik loh a tam danah hian khawilaiah emaw hian thil kalpui dan fuh tawk lo a awm tih a chiang a; sorkar document pawimawh tak ration card hi rang takin tihdik ni rawh se.