Duhthlanna thiang hman a ngai

Mizoram inthlan chungchangah tun hma deuha mi ṭhenkhatin an sawi ve fo chu, 'Tling tura duh vote loa tling tura rin vote' chungchang a ni. Sawi a awm fo avangin, a dik vek loh pawhin mi ṭhenkhatah chuan an dik a ni mai thei.

Tling tura kan duhte vote lo a, tling tura kan rinte vote ṭhin kan awm tak tak a nih chuan kan inenfiah a ngai hle ang. Ram danin mihring puitlinga a ngaih, chhia leh ṭha hriatna thiang hmang theia a ngaih, mahnia duh thlang theia a ngaih ni ve tawh si a, mahni ṭha tih leh duh zawng vote loa awm ngawt mai chu a puitling loh thlak hle àwm e.

Vote neite hi mahnia chhia leh ṭha hriatna hmang theia ngaih kan nih angin, rilru leh ngaihtuahna fím tak nen inthlanah kan duh thlang tur kan ni a; chu kan duhthlanna chu mi tu mahin an tihbawrhbàn kan phal tur a ni lo.

Mi tute'n emaw kan duhthlanna hmang ṭha thei lo khawpa eng hmanrua emaw hmanga min nawr a nih pawhin, kan chhia leh ṭha hriatna thiang hman tum hrâm hrâm ila, kan duh loh dana thil min tihtir tumtute chu hnâwl ngam tura kan intihhuaisen a ṭul.

Mizoram inthlanpui kan hmachhawn mekah pawh hian kan duhthlanna hmang thei lo leh kan mi duh tak thlang thei lo tura sum emaw, thil dang emaw hmanga min nawrtu an awm a ni thei. Chutiang kan lo tâwk a nih pawhin intihuaisen ila, kan mi duh tak, kan ram leh hnam kaihruaitu atana kan duh leh ṭha kan tih ngei thlang turin intipaukhauh sauh sauh ila a ṭha ang.

Inthlan hi khua leh tui zawng zawngin hlutna leh mawhphurhna inang tláng kan neih hun a ni a; vote nei tawhte chuan vote thlâk hi kan tih ngei tur, kan chanvo leh kan mawhphurhna a ni tih hre thar leh ila, kan mi duh tak thlanga vote thlâk ngei i tum ang u.