Zir chhuahna dah pawimawh a ṭul

Mizoram Police headquarters chuan tun hnai khan district tina police hotute hnenah lehkha thawnin, Mizoram mipuite chu engineering degree lem pe chhuak ṭhin zirna-inte laka fimkhur turin an chah.

India ramah hian zirna in lem, thiamna tak tak pe chhuak si loa degree pe chhuak ṭhin tam tak an awm tih hmuh chhuah a ni a; Association of Qualified Engineers-in HRD Minister hnena lehkha theh-luha engineering degree lem pe chhuak ṭhin an tarlante chu - JRN Rajasthan Vidyapeeth, Udaipur, Rajasthan leh Sandip Jha, Sandip Foundation, Sandip Academy & Scope Foundation University, Nasik, Mahrashtra-te an ni. Heng zirna inte mai ni lo, zirna line dangah pawh document lem hmanga degree pek chhuah a awm nia sawi ṭhin a ni.

Mizorama hna zawnna tam takah hian written exam pawh nei mang loin document aṭangin thiam leh thiam lo hi en an ni fo a, hei vang hian fimkhur a ṭul khawp mai. Mizoram state ṭhenawmah hian awlsam taka degree 'lei' theihna a awm nia sawi ṭhin a ni a, tun hma deuh aṭang tawh khan matric (HSLC) pass awlsamna bik state-te pawh awm hiala sawi ṭhin a ni. Thil pawi tak chu Mizoramah hna an rawn zawn ve leh si hian Mizorama zir chhuakte aia ti ṭha zawk anga an lan chang a awm fo a, chu chuan hna lakah nghawng a nei ṭhin.

Tun hnaia ram pum huapa degree lem pe chhuak ṭhinte laka fimkhur tura inzirtirna hi Mizoram sorkar pawhin ṭha takin vawng se, sorkar hna lak hrang hrangah khawi aṭanga zir chhuak nge an nih tih hi dah pawimawh se, mark hmu sang nazawng hi dah san vek pawh a ṭha ber lo a, zir chhuahna institution leh inziahluhna board/ university hi ngun takin enzui ṭhin rawh se.