Last minute-ah engtin nge ni ang?

MLA inthlan a awm apianga ṭawngkam lâr tak ni ve fo chu 'last minute' a ni. A awmzia erawh kan hre tlangpui àwm e. 'Last minute' tih ṭawngkam hi last minute satliah a ni lo a, dan anga inthlan campaign hun a tàwp hnu, inthlan hma ní hnih/khat leh a zan vela tute emaw chêt dan sawina a ni; a tlangpuiin vote zawnna atana sum sem leh dâwt thu vawrh darh a kâwkin a lang bawk.

Last minute tih hi sawi fo a ni miau mai a, a awmzia dik tak - inthlan hma ni hnih/khat chhunga sum sem pawh a awm ṭhin ngei a ni kan ti ngam àwm e. Bial leh khaw ṭhenkhatah phei chuan last minute-a che nasa tak tak sawi tur pawh an awm tawh ṭhin.

He last minute hi tunah hian kan tawng mek a, kan paltlang chho mek a ni. Khawi khua leh veng emawah chuan last minute-a vote zawnga vak kual dé dé, sum sem tum leh sem mek pawh an awm mai thei a, i hmaah an rawn inlan mai thei. Dâwt thu, thil rinawm loh lutuk thehdarh i hmu mek mai thei bawk.

Last minute hman ṭangkai tumtute hi ram hmangaihtu, ram hmasawnna tak tak tura hna thawh tum an ni lo tlangpuiin a rinawm a, MLA-a tling ngei ngei tum, hmanraw ṭha lo pawh hmang hreh lo, MLA/minister nihna chu sum leh paia hlâwkpui tum an ni tlangpuiin a rinawm. Ram tana mi ṭha lo, dan pawisa lo leh kohhran ngenna engahmaha ngai lo an ni tlangpui.

Last minute dang leh chu, inthlan dawn hnai tak taka dâwt muhlûm leh thu belhchian dâwl lo hmanga khingpuite beih a ni. Mi ṭhenkhan chuan tlin duh luat vangin an khingpuite tan insawifiahna hun a awm tawh loah dâwt ngialngan, mi rilru tiphâwklêk thei vawrh darh an chíng ṭhin. A hma zawnga sawi awm ngai lo, inthlan dawn hnaih tak taka thu vawrh darh thar a awm a nih chuan, thu belhchian dâwl lo leh dâwt thu, mi tu emaw beihna liau liau a ni thei tih hriain, âwih lo phawt mai ila, kan tifuh zâwk awm asin.

Last minute kan tawng mek a, kan paltlang mek; election danin a phal loh leh kohhranin a duh loh tawp anga thil tih i hmachhawn a ni thei; lo fimkhur la, fím takin awm ang che.