HIV/AIDS kan vei tlan a ngai

Presbyterian Kohhran Hmeichhia rorel inkhawm chuan, HIV/AIDS veite ṭanpui nan Mizoram puma kohhran hmeichhiate Thawhlehni zana inkhawm ṭum khat thawhlawm pek an rel.

HIV/AIDS hian kan ram a luhchilh thuk tawh hle a, chuti chung hian mipui nawlpui hian kan la ngaihven tawk lo. Mizorama mipuite zirtirna hmun ṭha ber nia sawi ṭhin chu Biak In leh kohhran programme dangte hi a ni a, HIV/AIDS dona lama mi ṭha-hnemngaite duh angin he thil hian kohhran beng a la thleng tawk lo.

Tunah erawh chuan kan ram dinhmun kan hrethiam ta a, Mizorama HIV/AIDS tamzia leh kan la chhiatpui theihzia hi mi ṭhahnemngaite zarah kan ramin kan hre ta. Kohhran lian ber Presbyterian kohhran-a hmeichhiate'n an vei ta hi thil lawmawm tak a ni a, hei hian rah ṭha a chhuah ngei a rinawm.

Kohhran-a nuho rualin an thawhlawm ngei hmanga HIV/AIDS avanga ṭanpui ngaite an pui tur leh, HIV/AIDS do tura a taka ke an pen tur hian nghawng ṭha tak a nei ang tih a rin theih a; tha kan thawhna leh sum kan senna hi chu kan ngaihven zui ṭhin a, chuvangin kohhran-a hmeichhiate'n HIV/AIDS hi a takin an do dawn ta niin a lang a, a lawmawm takzet a ni.

HIV/AIDS hian min luhchilh tawh a, a chhuak leh tawh dawn lo. HIV/AIDS veite chenpui thiam kan zir a ngai a, kan Mizo-pui tho leh kan chhungkhat leinate an nih hlawm avangin kan mihran tur a ni lo a, duat taka enkawl kan zir a ngai a, hemi kawngah hian nuho hi a thawhhlawk pawl tak an ni thei ngei ang.

Mizorama mipui awm zat leh HIV/AIDS kai zat teh hian kan ram hian chhiatna nasa zawk a hmachhawn mai ang tih a hlauhawm a, chuvangin mahni theihna zawn ṭheuha HIV/AIDS do tura ṭan kan lak a ngai.