Sorkar ṭha

Public Affairs Centre, Benga-luru chuan India ram state 29-a sorkar inrêlbawlna a zirchianna, Public Affairs Index chu tun hnai khan a tichhuak a, Mizoram chu state tê zingah pakhatna a ni.

Sorkar ṭha an tehna, Public Affairs Index atana zirchianna hi Rajasthan chief secretary hlui Dr CK Mathews kaihhruaina hnuaia neih a ni a; tehkhawng hlawm lian chi 10 hnuaiah tehna tênau 68 a awm leh tih a ni a. Heng tehna hrang hrang aṭanga point hmuh zat belhkhawmah state tê, mi nuai 200 aia tlem chênna state 12-ah Mizoram chuan point hmu a sang ber a ni.

Mi thiamin an teh hnuah, "In sorkar kha sorkar ṭha a ni e," min rawn ti a, keini tan chuan thil lawmawm tak a ni. Hetihlai hian a taka he sorkar hrawntute hian sorkar ṭha kan hrawnin kan inhria em, tih erawh chhan harsa tak a ni a; state te 12 zinga a ber nih hi a lawmawm rualin kan dinhmunah erawh kan lawm kim lo tih chu zep rual a ni lo.

Tun hma deuh pawh khan magazine ṭhenkhatin an tehnaah Mizoram hian lawmman a lo dawng ve zauh zauh tawh a, thil lawmawm tak a ni. A ṭha zawnga in tehna a ni a, a hmu hniam pawl nih chu thil lawmawm a ni hauh lo ang a; nimahsela a pawimawh ber chu sorkar hrawn mektu mipuite tehnaa kan san leh san loh hi a ni zawk awm e.

Tun hnaia Mi-zoram hlawhtlinna hi thil lawmawm leh chhuanawm tak a ni a, mipui nawlpui tehnaah pawh sorkar ṭha a nih tel theihna turin Mizoram sorkar hian ṭan la se, pawn lam aṭanga tehnaa a hmu sang ang bawk hian a chhunga chengte'n an tehnaah hmuh san tum rawh se.