Sorkar laka thikthu chhiat

National Food Security Act (NFSA) hnuaia ration card dik lo a tam avangin mipui an phun nasa hle. NFSA ration card-a dik lo tam tak hi FCSCA minister leh director-te chuan tidik turin hna an thawh ṭan tawh thu an sawi a; NIC-te nen pawh an sawiho tawh a ni.

Ration card-a hming dik lo, pian kum dik lo, chhungkaw inkhai-diat dan dik lo taka ziah luh hian sawi a hlawh a, keimahni nihna ngei an tih dik loh avangin kan ngaimawh a ni. Hei hi tihsual palah pawh ni se an tisual tam lutuk hi chu thawktute inthlahdah vang a ni a, insawi thiam leh insawi mam chi pawh a ni lo a, a tisualtute hi hrem hial tlak an ni ang.

Hetihlai hian ration card-a thil tihsual palh hi chu siam ṭhat leh theih mai a ni a, an siam ṭha leh thuai dawn niin a lang a; amaherawhchu ration card-a hming tihsual mai ni lo, kan chanvo tur dik tak kan chan loh tam tak awmte hi kan au chhuahpui lo zawk ngawt mai.

Kan kawngpui neih tur ang kan nei lo a, a chhuat a panin a chhe hma em em a, tui luanna tur pawh an siam ṭha lo a, tui pawh kan hnianghnar tawk lo a, sorkar building-te pawh a nih tur ang a ni lo. Kan chan tur thil tam tak hi a nih angin kan chang lo a, tute'n emaw suam siamna remchangah hmangin vantlang tana ṭha turte pawh pawh pên a ni ṭhin. Heng thil serious leh nghawng nei thui takte hi vei tel ila, heng thila a nih tur ang a nih loh hian au chhuak ila, sorkar lakah hian thikthu i tichhe lehzual ang u.

Tunah hi chuan keimahni min den dawp hma chu kan thlir liam mai a, sorkar lakah mipui thikthu a chhe tawk lo a, thuneitu ni tura mipui thlan lalte leh mipui tana hnathawk tura sorkar mi rawih-te hian an duh angin lal an hrawt emaw tih mai tur a ni. Ration card-ah chuan kan hming ngei, kan pian kum leh nihna ngeite an rawn tisual a, kan âng bawrh bawrh a, kan sawi chhuak a, hei hi chu siam ṭhat theih a ni. Sorkar hnuaia hna chhe lutukte hi au chhuahpui ila, kan chan tur kan chan loh thilahte hian âng ngam ila, sorkar laka mipuiin kan thikthu kan tihchhiat zual poh leh sorkar a fimkhur ang a, rorelna dik leh ṭha zawk kan hnaih deuh ang chu.