Engineer-te tana chona

National Drinking Water and Sanitation Awareness Week hawngtu PHE minister chuan, PHE engineer-te chuan lui aṭanga tui pump chhuaha sem chu an thiam tawh hle tih a sawi a, "Tui sem mai piah lamah tui herh hawna tap aṭanga in nghal ngam khawpa thianghlim tui sem thei turin ka challenge che u a ni," a ti.

Tun hnaiah PHE minister hian engi-neer-te tana chona (challenge) hi a sawi chhuak zauh zauh a, hei hian engineer-te hi phurna a pek ngei a beiseiawm. Minister berin tui herh hawa in nghal ngam sem turin chona a siam a, hei hi a takin chhang ngei se a duhawm khawp mai.

Hetihlai hian minister-in a engineer-te a fuih a, a cho reng mai hian ngaihtuah a tithui hle mai a, hengte hi chu room inkharkhip chhunga (closed door meeting) sawi a, chhungkua anga inzilhna leh infuihna chi niawm tak a ni a; vantlang hriata kan engineer rualte tana chona han sawi chhuah fo pawh hi a letling zawngin a thawk ve thei a, ṭha-hnemngaih luatah hnathawktu tur berte hi kan chhaih lutuk palh thei tih pawh hriat tel a
ṭha awm e.

Tuna kan thlen chinah chuan PHE department-ah hian nasa takin hmasawnna hmuh tur a awm a, ṭan an lak chhoh zel chuan hmasawnna lian zawk pawh kan la hmuh belh zel a beiseiawm. PHE leh a kaihhnawih sorkar department-te hi an inkungkaih ṭhat a, an thawhhona a ṭhat phawt chuan hnathawhna tur sum a awm a, hnathawk thei tur mithiam rual pawh an kawl a, inlungrual tak leh phur taka thawh hi an mamawh ber niin a lang.

Minister-in tui intlak pump chhuak tura chona a siam hi PHE engineer-te hian chona tak takah ngai se, a taka tihlawhtling thei turin ṭan la se, a loa kan awm theih loh tui thianghlim hnianghnar taka dawn hi Mizorama mipuite hian an phu (deserve) a ni.