Budget-ah hmasawnna

Finance minister Lalsawta chuan Assembly session-ah kum 2016-17 atana Mizoram budget tura ruahman cheng vbc. 8038.39 a pharh a; kum 2015-16 budget cheng vbc. 7576.56 aiin vbc. 461.82-in a tam. Sorkarin 2016-17 aṭangin New Economics Development Policy (NEDP) a kalpui ṭan dawn tih a sawi.

Mizoram hian budget session a nei ve nual tawh a, tun ṭum budget sawiho tur sawi hawn niah hian thil chhinchhiahtlak tak a awm a, chu chu Finance Minister-in press conference a ko zui hi a ni. Mipui nawlpui hian budget hi an hrethiam tak tak lo a, kan MLA zingah ngei pawh budget kalphung hrefiah kim lo an awm thei ang a, mipui aiawha press lamin zawhna an zawh ve theih tura Finance Minister-in ruahmanna a siam hi chhunzawm zel theih ni se a ṭha khawp mai.

Sorkar hian Mizoram sum dinhmun siam ṭhat tumin nasa takin ṭan a la tih a hriat theih a, budget pharh a nih hma pawhin mipui chuan sorkarin sum siam a tum dan hi an hre chiang tawh. Tun hmaa chhiah a lak ngai lohna ṭhenkhatah chhiah a la thar a, chhiah awm sa tam tak a tipung bawk a, state-in thawh chhuah tam zawk a neih theihna turin ṭan a la nasa a ni.

Tunah chuan Mizoram sum dinhmun tlemin a ziaawm ve ta hret niin a lang a, a sum neih zat a pung a, sum lakluhna tur ruahmanna thar a nei bawk a, hei hian state-ah hmasawnna a takin lantir se a duhawm khawp mai. Mizo-rama mipuite lung-awi theih lohna ni ṭhin chu budget pung si, hnathawha lang chhuak ṭhin si lo hi a ni a; sorkar hnathawkte hlawh leh inrelbawlnaa kal ral leh mai mai lo tur khawpin state hian sum nei thei se, hmasawnna hna-thawh hi a takin lang chhuak rawh se.

Tun ṭumah hian Finance minis-ter budget awmzia leh a kalphung hre chiang tak kan nei niin a lang a, budget chungchanga zawhnate pawh ṭha takin a chhang thei a, hmasawnna lawmawm tak a ni. Hma-sawnna tluantling a awm theih-na tur erawh chu pawisa chhawp chhuahte hi a nihna tur anga dik taka hman kawngah a ni a, Finance Minister hian ṭan la chhunzawm zel rawh se.