Term thum a sorkar theih em?

MPCC president leh chief minister ni bawk chuan, "Tute'n emaw Mizoramah term thum a sorkar theih loh anga an sawi fo hi India ram state dangah pawh a theih avangin Mizoramah a theih loh chhan tur a awm lo," a ti a; thingtlang leh khawpuiah an party an pung zel niin a sawi.

Mizoram political history-ah a zawna term thum sorkarna chelh an la awm lo a, term hnih hnuah sorkarna chelhtu an inthlak tlangpui. Tun hnaiah Congress chuan a term thumna atan sorkar an tum thu leh a theih tur thu an sawi ṭhin a, eptu lam erawh chuan Congress chu term hnih an sorkar mek avangin an hun tawp an hmang chho mek niin an sawi ve thung.

Term thum a sorkar theih leh theih loh tur thu hi chu rinthu mai a la ni a, term thum sorkar tum lam chuan a theihzia an sawi ang a, sorkar mekte tla tura duhtu lamin term thum sorkar harsatzia an sawi ve thung ang. Thil la thleng lo a ni a, a thleng dawn nge dawn lo a la hriat loh a, thil thleng thei a nih rualin thleng lo ve thei a ni tel bawk a, tuna lo inhnial hi chu thil atthlak tak a la nih hmel.

Thil hlauhthawnawm tak erawh chu term thum tlin theihna turin tih hre an nei lo palh mai ang tih a hauhawm a, chutiang bawkin term thumna hmang lo tura duhtu lam pawhin tihtlak an tumna lamah hmanraw thianghlim tawk lo an chelek mai ang tih a hlauhawm khawp mai a, political party-te fimkhur takin che se a ṭha ngawt mai.

Term thum tlin theih dan chu ṭha taka ram kaihhruai a, dik taka rorel a, mipuite nitin mamawh pek a, ram sum dinhmun siam ṭhat a, hmasawnna kawnga kal hi a ni. Hetianga an kal theih chuan tuna sorkar mek tan pawh term thumna atana tlin hi thil theih a ni a; nimahsela rorelna ṭha leh dik kalpui si lo a, term thum tlin dan ngawr ngawr an zawn chuan thil hlauhawm tak a ni ang.

Term thum hi tlin theih a ni tih chu state dangah a takin an lantir tawh a, heng mite hi chuan mipuite mit tlungin ro an rel ṭhin. Kum 2018-ah mipuiin roreltu tur an thlang dawn a, rorel mektute hian mipui mit an tlung a, ram tan hna an thawk ṭha a nih chuan mipui chuan an thlang tling leh thei ang a; roreltu tur mipuiin thutlukna an la siam dawn a, tuna term thum tlin a theih thu lo sawi lawk hi chu a la hma deuh lo maw?