Vote i thlâk ang u

Vawiin November 7, 2023 hi kum nga lo kal leh tur mai ni lo, a hnu lam thlenga Mizoram dinhmun hril thei tur Mizoram hruaitu thlan ní a lo ni ta a, polling station tinah tluang taka vote thlak theih a nih beisei ila.

Inthlana mawhphurtu, inthlan buaipuitu zawng zawngte'n an mawhphurhna ṭheuh ṭha taka an hlen theih nan duhsakna kan hlàn a; mipui lam pawh ngaihtuahna fím tak leh tu'ma tihbuai loha zalên taka vote an thlâk ṭheuh theih nan duhsakna kan hlan a ni.

Kum 2018-a Mizoram Legislative Assembly inthlanpuiah khan vote 80.03% a tla a, a ṭha thawkhat viau mai. Kum 2018-a vote tla zat kha kumina inthlanpuiah hian kan khûm thei ang em? Khûm tur chuan vote nei, Mizorama awm tawh phawt chuan vote kan thlâk ṭheuh a ṭul àwm e.

Mipuiin ram hruaitu atana kan mi duh tak thlanga vote kan thlâk hi mipui rorelna, democracy bulṭhut a ni a, a hlu tak zet. Mipui hi ram hruaitu siamtu leh a ṭul huna paih leh theitu kan ni tihna a ni. Chuvangin, mipui kan pawimawh em em a, kan mawhphurhna pawh a sang hle kan ti thei ang. Chu kan mawhphurhna chu mipui, vote nei zawng zawng hian hlen chhuah ngei kan tum tur a ni.

Democracy ram kan nih hlutzia te, mipuite zalên taka kan awm theih chhan pakhat a ni tihte hre chiang thar leh ila. Kan ram hma lam hun tur ngaihtuah chung leh ram hruaitu atana mi ṭha ngaihtuah chungin duh thlang ila; Pathian ráwn chungin roreltu atana a mi ruatte kan thlan chhuah theih nan ṭan la ila a ṭha hle ang.

I hlu a, ka hlu a, kan zavaiin kan hlu. Ram hruaitu thlang tur hian khua leh tui tu pawh hi kan hlu vek a, hlu bik leh hlu lo bik kan awm lo. Vote thlâk hi kan dikna chanvo, kan mawhphurhna, kan tih ngei tur a ni tih hriain, vote thlâk ngei i tum ang u.