Pawm thiam a ngai dawn

Mizoram State Legislative Assembly General Election vawi kuana chu buaina leh harsatna lian tham awm loin tluang taka neih a lo ni ta a, a lawmawm tak zet.

Inthlan buaipuitu sorkar official zawng zawngte inpekna leh thawhrimna a ropui tak zet a, thil tihsual palh hlauhawm tak, tihsual palha hnain a tawrh theihna karah rim takin an thawk a, tluang leh felfai takin thil an ti a, fak tlâk an ni.

Sorkar official-te a ṭul anga pui tur leh an hna tiawlsam turin Mizoram People Forum (MPF)-te'n a ṭul apiangah an pui a, MPF hmunpui lama mite leh forum hrang hranga mite'n hlawh nei loin ṭhahnemngai takin an thawk a, an hnathawh leh inpekna a ropui hle. MPF hian inthlanna thianghlim, felfai, muanawm leh zalen a awm theih nan inthlan hma aṭangin nasa takin hma an la a, an hmalaknain rah ṭha a chhuah zel a, a lawmawm tak zet a ni.

Political party hrang hrangte sorkarna siam tura inbei an ni a, thil tam tak an ti a, an sawi bawk a. Thuthang mawi tâwk lote awm ve bawk mah se, state pum leh hnam anga mualphona theihna tur khawp thil an ti lo niin a hriat a; candidate leh an tana beitu ṭhenkhat phei chuan mi pawisawi leh dan bawhchhiat hlau takin thil an ti niin a lang bawk a. Candidate te, political party hruaitute leh an mi leh sate pawh an ṭha thawkhat niin a ngaih theih a, a lawmawm hle.

Inthlan result leh thlan tlinte hriat la ni lo mah se, a nih ang ang a ni tawh a, tihdanglam theih a ni tawh lo. Ṭhenkhat an tlin laiin, a tam zawk chu an tling zo lo ngei dawn. Kan tling emaw, tling lo emaw, kan dinhmun chu eng pawh ni se, kan hriatthiam a ṭul a, tun aṭangin rilrute pawh kan tihthâwl thiam a ṭha àwm e.

Candidate te, political party-te leh party mi leh sa te, mipui náwlpui pawhin roreltute hi Pathian ruat an ni a, Pathian ruat kan thlang chhuak a ni tih kan pawm thiam a ngai dawn a ni.