Chak loh leh chhuanlam zawn

MLA General Election 2023-ah thil fel tâwk lo a awm vanga vote thlâk ṭhat ngaihna Muallungthu polling station-ah tluang takin vote thlak a ni a, tunah chuan Mizoram inthlanpuia vote thlâk bik chu kan zo thawkhat ta niin a lang a, a lawmawm tak zet.

Tunah chuan vote chhiar hun kan nghâk ta a, mi tinin kan nghâkhlel hle pawhin a lang. Vote chhiar hun hi Pathian hruainain tluang takin kan thlen turah ngai ila, harsatna awm loa chhiar a nih ngei pawh beisei ila, kan ram hruaitu tur mi 40-te kan hre thuai dawn a ni.

Hetih lai hian, ṭum dang aiin inthlan vote thlâk leh vote chhiar inkar hi a zau deuh niin a lang a, chuti chu ni mah se, vote thlâkna hmanrua electronic voting machine-te uluk tak leh khauh takin chhùn zàn zawma vèn a ni a, chuvangin a him tâwk ang tih ring ila a ṭha àwm e.

Hun kal tawhah EVM khawih danglam a awm ni àwm taka thehdarh leh zèldin thu nena inbáwl phuan a, mi rilru tibuai tura thu thehdarh a lo awm tawh a. Tun ṭumah hi chuan vote thlâk leh vote chhiar hun inkar hla deuh mah se, khatiang ang chi kha chu a awm tawh lo turah ngai ila. Election lama thuneitute leh inthlan buaipuitute hian thil dik lo a awm hlau em emin thil an ti ṭhin a, EVM vên zui chungchangah pawh a ṭha thei ang ber tura an hriat angin thil an ti a ni a; chuvangin, mipui, a bikin political party mite pawhin i ring tâwk ang u.

Inthlan hi la urh tak tak an tam a, chak loh avanga rilru na tak takte pawh an awm ṭhin ang. Chak lo zawk nih hian chhuanlam zawn a awl viau bawk. Hnehtu nih thiam a ngai ang bawkin, chak lo zawk nih thiam a ngai a, thil àwm lo lutuk thleng thlenga chhuanlam zawng chawp lo tura rilru kan siam a ngai àwm e.