Inthlan leh huat thu

November 7, 2023 khan Mizoram MLA inthlanpui atan tluang takin vote thlak a ni ta a, ruahman lawk ang chuan December 3-ah vote chhiar a ni ang a, chumi zawhah inthlanpui hi zawh fel a ni ang.

Inthlan boruakah hi chuan political party mi leh sâ mai ni lo, 'neutral' intite pawh an ṭang tlang ṭhin a, kum nga lo awm tur chhunga Mizorama roreltu tur thlanna a nih miau avangin ṭan a na hle a ni.

Hetihlai hian ṭan luat avanga mi dang pawi sawi palh emaw, sorkar dan phal loha chêt emaw pawh a awm thei. A inthlan ber a zawh fel tawh hi chuan heng thilte hi theihnghilh a, hma lam thlir thiam a pawimawh dâwn hle a ni.

Chutiang a nih loh chuan a inthlan ber a zawh tawh hnuah pawh ṭhenawm khawveng inhmuh thiam lohna te, unau leh chhungkhat hial karah pawh boruak ṭha lo a awm zui palh ang tih a hlauhawm hle.

Political party ṭan lam a nat deuh hi chuan kohhran thlengin a nghawng thei a, hei vang tak hian a tute pawh hian huat thu ti chhe lo ila, rorelna ṭha a awm theihna tura intihsiak kan ni tih hrethiam ila, a lawmawm ngawt ang.